Saqqummersitsineq
Eigil Knuthip tunumiunik kiataannaliai saqqummersinneqartut
Tallimanngormat Kalaallit Nunaata Katersugaasiviata ilaatigut qiperuisartup, atuakkiortup issittumilu ilisimasassarsiortartup Eigil Knuthip kiataannaliaanik immikkut ittumik saqqummersitsineq ammarpaa
Kalaallit Nunaata Katersugaasiviani immikkut saqqummersitsinerm 1930-ikkunni tunumiunik inuusaliat takutinneqarput, katersugaasivik tusagassiorfinnut nalunaarutikkut allappoq.
Eigil Knuthip tunumiut alutorillualerpai 1936-imi Kitaanit Tunumut sermersuaq itivillugu franskit ilisimasassarsiorneranni peqataalluni.
ilisimasassarsiornermut atatillugu Tunumi ukiivoq tunumiullu, pingaartumik kiinaat, alutorilluaramigit kusanartumik kiataannanngorlugit qiperortarsimavai.
Maanna Eigil Knuthip eqqumiitsuliai Kalaallit Nunaata Katersugaasiviani takuneqarsinnaapput, franskip antroprolog-ip Robert Gessain-ip, 1934-imiit 1935-imut Ammassalimmiissimasup tunumiut oqaasii kulturiallu ilisimatusarfigalugit, assinik saqqummersitai ilanngullugit. Saqqummersitat takuniarneqarsinnaapput 2015-imi septembarip 30-ata tungaanut.