Saqqummersitsineq
Egevangip Leinellu nunarput nittarsaappaat
Kim Leinep Carsten Egevangillu nunatsinni assilisatik Polenimi saqqummersissavaat, tassani danskit kulturilerisut aaqqissuisuupput
Polenip illoqarfiisa pingaarnersaanni Warszawa-mi Kalaallit Nunaanni assilisanik saqqummersitsisoqassaaq.
Saqqummersitsineq polenermiutoorlugu 'Grenlandia'-mik atserneqarsimavoq, isumaqartoq Kalaallit Nunaat. Tassani Carsten Egevangip pinngortitami assilisai saqqummersinneqassapput. Saqqummersitsineq unnugu tallimanngornermi nalunaaqutaq 19.00 aallartissaaq, Carten Egevang peqataassaaq, nunatsinnilu assiliisarnini suliaqartarninilu saqqummiutissallugu.
- Polenermiut Kalaallit Nunaat pillugu ilisimasaqarpallaanngillat, Warszawa-mi danskit kulturilerisarfianni pisortaq Boguslawa Sochanska oqarpoq.
- Kalaallit Nunaat polenermiunut allanartuuvoq ilisimaneqarpianngivissoq. Carsten Egevangip assilisai kusanartut saqqummersitsinissamut aallarnisaasuupput. Kalaallit Nunaata assitai saqqummiunneranni aamma Kalaallit Nunaata kulturia qangarnisaasoq saqqummersitsinermi sammineqassaaq kiisalu inooriaatsimut nutaaliaasumut nunap ikaarsaarnera aamma sammineqassalluni. Kiisalu pinngortitami unammilligassat aamma sammineqassallutik, Boguslawa Sochanska oqarpoq.
Filmi aamma takutinneqassaaq
Kalaallit Nunaannut ilisimasat annertusarniarlugit Polenimi saqqummersitsisoqarpoq.
Atuakkiortoq Kim Leine nunarput pillugu filmimik takutitsissaaq, meeqqanut sammisaqartitsissalluni inuusuttunillu oqallititsissalluni.
Carsten Egevangip assilisai illoqarfinni Szczecin-imi kiisalu Katowice-milu aamma saqqummersinneqassapput.
Saqqummersitsinermi assit ilanngunneqartussat ilaat qulit takukkit