NunaMinerals
Hans E.-p Nunamineralsip akiliisinnaajunnaarnerani politikkertoqarsoraa
Partii Naleqqap siulittaasuata Hans Enoksenip Nunaminelsip akiliisinnaajunnaarnera uggoraa. - Eqqoriaavunga politikkikkut aporaattoqarneratigut annaassiniarnerit ingerlariaqqissinnaangaluartut alloriartoqanngitsoq, oqarpoq
Aatsitassarsioqatigiiffiup Namminersorlutik Oqartussanit ilaannakortumik pigineqartup Nunamineralsip siulersuisuisa ulluinnarnilu aqutsisuisuisa sapaammi aalajangerpaat akiliisinnaajunnaarnermik nalunaaruteqarniarlutik suliffeqarfik immikkulli januaarimi ataatsimeersuareermat siulersuisut qullersallu suliffeqarfiup ingerlateqqinnissaanut aningaasaliisussamik allamik ujarlersimagaluarlutik iluatsitsinngittullu.
‘Selskabimi piginneqataasunut tamanut iluaqutaasussamik aaqqiissutissarsiorluni periarfissat tamarmik misissorneqarsimapput’, suliffeqarfik sapaatiummat unnukkut tusagassiorfinnut nalunaarummini kingullermi taama allappoq.
Atuaruk: Siumup Nunamineralsimit isornartorsiorneqarnini 'ajuusaarutigaa'
Politikkertoqarnera ilimagivaa
Aatsitassarsioqatigiiffiup Namminersorlutik Oqartussanit ilaannakortumik pigineqartup akiliisinnaajunnaarnera Partii Naleqqap siulittaasuata Hans Enoksenip uggoraa. Taassumalu eqqoriarpaa aatsitassarsiorfimmik ajornartorsiortumik annaassiniarnermi politikkertoqalersimasinnaanera.
- Eqqoriaavunga politikkikkut aporaattoqarnera pissutigalugu annaassiniarnerit ingerlariaqqissinnaangaluartut alloriartoqanngitsoq, Hans Enoksen oqarpoq Nunamineralsillu pisortaanerata Ole Christiansenip Siumup naalakkersuinikkut siuttunngornera pitsaanngitsumik kinguneqartitsinerarlugu februaarimi uparuaanera tikkuarlugu.
Ole Christiansenip taamani uparuaanermi ilaatigut eqqaavaa Siumukkormiut royalty atorlugu aatsitassarsioqatigiiffinnik aningaasaleerusussinnaasunik qimaatitsimasut.
- Illuatungaaniillu immaqa Naalakkersuisuniit nuanniigineqarluni Nunamineralsimut ikaartarfiit ikuallatsinneqarput, Hans Enoksen oqarpoq. Taassumalu ugguaraa Naalakkersuisut Nunamineralsimik annaassiniarnermi periarfissanik misissuinerusimannginnerat.
Atuaruk: Nunatsinni ujaasinermik ingerlatsinerpaaq akiliisinnaajunnaartoq
Atuaruk: Suliffeqarfik misissueqqissaarnermik ingerlatsisup siunissaa ullumi paasineqassaaq
Ilisimasat annaaneqarput
Nunamineralsip akiliisinnaajunnaartutut nalunaaruteqartussanngornernini sapaammi nalunaarutigigamiuk ilaatigut allappoq Greenland Mining Managementip (GMM) annaassiniutissatut kingullertut neqeroorutaa Namminersorlutik Oqartussat atorsinnaasutut isigisimanngikkaat. Taamaattumillu suliffeqarfik akiliisinnaajunnaartutut nalunaaruteqartariaqalersoq.
- Ajuusaarnartorujussuuvoq, ilisimasatsiarsuillu tassa annaasussanngorpagut, Hans Enoksen oqarpoq. Taassuma tikkuarpaa Naalakkersuisut Nunaminerals suleqatigalugu aningaasatigut aporfiit misissoqqissaarsimasariaqaraluaraat, immaqalu immaqa aningaasatigut ikiorsiissuteqarlutik.
- Siunissami aatsitassarsiornikkut pitsaasumik ingerlassagutta Nunatsinni nammineq aatsitassarsiorfimmik peqartariaqaraluarpugut. Taamaalillunilu ilisimasat aamma maaniiginnarsinnaallutik, Hans Enoksen oqarpoq.
Nangipporlu:
- Juuntaap oqartarneratuut: Politikkertassaagut, kisianni ikinngutigiinnerpugut puigussanngilarput.
Nunaminerals pillugu allaaserisat allat uani atuakkit