Kongeligt
Dronningip ernuttani kuultinnanniunnermut isiginnaariaqatigissavai
Qallunaat assammik arsarluni nunanut allanut unammisartuisa sapaartiuppat Frankrig EM-imi finalernermi unammippassuk dronningi isiginnaartut akornanniissaaq
Danmarki Frankrigilu sapaatiuppat assammi arsarluni EM-imi finalimi kuultinnanniullutik unamminerat pissanganassaqaaq.
Herningimilu Boxen-imi isiginnaartut 14.000-it akornanniissaaq dronning Margrethe, taamatut allappoq ekstrabladet.dk.
Kunngussaq Frederik sapaatit akunneri marlungajaat matuma siornatigut EM aallartimmat qallunaat Makedoniamut unammineranni isiginnaaqataavoq. Maannalu dronningi qallunaat kunngikkormiui sinnerlugit isiginnaaqataassaaq.
Avisi allappoq paasisimallugu tallimanngormat semifinalimi qallunaat Kroatiamut ajugaanerisa kingorna kunngikkormiut Dansk Håndbold Forbundimut nalunaarsimasut finali isiginnaarusullugu.
Isiginnaariassappunngooq dronningi prins Henrillu, naluneqanngitsutut Frankrigimeersoq. Aviisi allappoq dronningip ernuttami ilai ilaginiarai.
Aamma atuaruk: Danmarkip Kroatia ajorsartippaa finalimullu anngulluni
Dronning siullersuusumik assammik arsarluni pissartanngorniuttunik isiginnaassanngillaq. 2004-mi Athen-imi OL-mi arnat assammik arsartartut kuultinnanniunneranni isiginnaaqataavoq, taamanikkullu qallunaat ajugaapput.
Aamma Danmarkimi politikerit nuimanersaannik isiginnaariartoqassaaq. Ministeriuneq Helle Thorning-Schmidt (S), januaarip 12-anni Danmarkip unammeeqqaarnera aamma isiginnaaqataasoq, Herningimut isiginnaariarniartoq Ministeriuneqarfik nalunaarpoq.