DR: Angerlarsimaffimmi grand prix ajornakusuussaaq
Eurovision-ip Københavnimi ingerlanneqarnerani 21-nik ukiulik Basim Danmark sinnerlugu peqataassaaq taamalu angerlarsimaffimmini unammeqataassalluni
Arsaannermi timersuutinilu allani angerlarsimaffimmiinnerup iluaqutaasarnera eqqartorneqakulasarpoq, Eurovision-ili allarluinnaavoq.
Sisamariaannarluni nuna internationale melodi grand prix-imi ajugaasoq ajugaaqqittarsimavoq.
2001-imi Danmark taamaasiungajavippoq, qallunaat Rollot og King Københavnimi Parken-imi normu 2-ngormata.
21-nik ukiulik Basim ajugaaniassaaq maajimi Danmark sinnerlugu europæiske melodi grand prix-imi peqataaguni, tamannalu Københavnimi ingerlanneqassaaq siorna qallunaaq Emmelie de Forest ajugaanikuummat.
DR-imi underholdningsredaktørip Rasmus Ladefogedip nalunngilaa Basim ´Cliche Love Song´ atoruniuk ajornartorsiussasoq.
– Kingullermik Rollo og King ajugaaqqingajavipput, nalinginnaasumilli oqartoqarsinnaanngilaq angerlarsimaffimmiinneq iluaqutaasoq. Tamanna ikittuararsuariarluni pisimavoq, taanna oqarpoq.
Københavnimili scene-miinnissaq iluaqutaassaaq.
– Tassa imaappoq qallunaanit tapersersorneqartorujussuussaaq, ajornavianngilarlu taamatut ajugaatinneqaruni, Rasmus Ladefoged oqarpoq, isumaqarporlu Basim ajugaasinnaasoq.
– Catchy pop-imik nipilersugaq pitsaassuserpassuaqarpoq, tamannalumi jury-p qallunaallu isumaqatigisimavaat. Modernemik pop-imik nipeqarpoq uteqattaarneralu torrallataaqaluni, taanna oqarpoq.
Eurovision-imi finali maajip 10-anni ingerlanneqassaaq.