Doris: Napparsimasut ikiorniartigit

Utoqqaq kræftimik nappaatilik rullestolertoq Kangerlussuarmi akunnerni arlalinni utaqqisoq qasoqigami nerrivimmut pululluni sinittoq. Doris Jakobsenip oqaluttuaq tamanna oqaluttuaraa isumaqarlumnilu pissutsit taamaattut akuerineqarsinnaanngitsut illersorneqarsinnaanngitsullu.
Doris Jakobsen Siumut tunuliaqutaralugu Inatsisartunut Folketingimullu ilaasortaavoq taamaattumillu angalasartorujussuulluni, Kangerlussuarmullu aqqusaaraangami inuppassuit naapittarpai, oqarporlu napparsimasut aqqusaartut qausersaartarfimmik amigaateqartut. Tamanna iluarsineqaqquvaa.
Paragraf 37 naapertorlugu Naalakkersuisunut apeqquteqarpoq napparsimasunut piartortunullu, Kangerlussuarmut aqqusaartunut pissutsit pitsanngorsarnissaanik Naalakkersuisut pilersaaruteqarnersut. Akunnerpassuarni utaqqisarnerminni ajornartorsiuteqarput, utaqqisarfimmik qasuersaartarfimmilluunniit amigaateqaramik.
Apeqqunni tunngavilerpaa sapaatip akunneri tamaasa Kangerlussuaq inuppassuarnik aqqusaarneqartarmat. Tamakkua ilagisinnaasarpaat naartusut, ajutoorsimasut, napparsimasut kiisalu piartortut.
– Kræftimik nappaatillit, peruluttut aammalu ikiorneqaqqissinnaajunnaartut Rigshospitalimiik nunatsinnut angerlartinneqartarput ilaanni allaat ingiallorteqartinneqartaratik. Taakkua amerlanersaasa Kangerlussuaq aqqusaartarpaat, ilaannilu ingerlaqqinnissaminnut sivisuumik utaqqitinneqartarlutik.
– Taakkua napparsimasut, tiimerpassuit Kangerlussuup kantiinaani issiartarfiinilu utaqqisariaqartarput innangaarfissaqaratik nipaatsumiluunniit qasuersaarfissaqaratik. Tamanna napparsimasunut piartortunullu pitsaasuunngilaq toqqissisimanaranilu, Doris Jakobsen oqarpoq, isumaqarporlu Naalakkersuisut ingerlaannavik napparsimasunut Kangerlussuarmut aqqusaartunut qasuersaartarfimmik pilersitsisariaqartut.