Dorisip naartuersittarnerit ikilisarniarpai

2009-p 2013-illu akornanni ukiumut naartuersittarnerit 800-t.

Peqqissutsimut Naalakkersuisoq Doris Jakobsen, Siumut, isumaqarpoq taakkua amerlavallaartut.

– Nunatsinni napparsimmavinni ullumikkut naartuersitsisarnivut amerlavallaaqaat. Ineriartornerup nuanniitsup tamassuma pitsaaliornissaanut tamatta eqqumanerusariaqarpugut. Tamatta akisussaaffeqarpugut, minnerunngitsumik meeqqanut inuusuttunullu angajoqqaajusut. Napparsimmaviit tamarmik naartunaveersaatinik akeqanngitsunik tunioraasarput, soorlu p-pillit, spiralit usuullu puui, peqqissutsimutnaalakkersuisoq Doris Jakobsen tusagassiorfinnut nalunaarutikkut oqarpoq.

Paasissutissiineq

Pinaveersaartitsineq Naalakkersuisut samminiartorujussuuvaat. Peqqissutsimut Pinaveersaartitsinermullu Aqutsisoqarfiup ataani Peqqissutsimut Naalakkersuisoqarfiup ukiuni kingullerni ´inuusanik suliniut´ ingerlassimavaa, tassanilu atuarfiit suleqatigalugit inuusuttunut paasisitsiniutigineqarput inuusuttuulluni meerartaarnerup kingunerisai tamannalu peqatigalugu naartunaveersaatinik paasisitsiniaasoqarluni.

Tamatuma saniatigut Kalaallit Nunaanni sumi tamani peqqissaasut juumuullu kissaatiginagu naartulernissap pitsaaliornissaanik paasissutissiipput.

Naalakkersuisup ilanngullugu paasissutissiissutigaa atuartitsissutit nutarterneqarnissaannik, atuartitsinermilu isumannaatsumik atoqatigiinnerup sammineqarnerulernissaanik atuarfeqarfimmik suleqatigiinnermik pilersitsinissaq maanna sulissutigigitsik. Peqqissutsimut Naalakkersuisoqarfik Peqqissutsimullu Aqutsisoqarfik kinguaassiornikkut peqqissuunissaq pillugu paasisitsiniaanissamik sulissuteqarput.