Dorisip Mimi akissuteqarfigaa: Tunisassiorfinni ilinniarnerit aallartinneqalerput

Sermitsiaq.AG-ip piffissami kingullermi Royal Greenlandip kinamiut sulisartunik 27-inik Qeqqani Avannaanilu tunisassiorfinni sulisutik ilaniaraat allaaserineqarpoq, tassanilu kinamiut Royal Greenlandimi sulisut katillutik 62-inngussasut.

Kinamiut suliartut allaaserineqarnerinut atatillugu Inatsisartunut ilaasortaq Mimi Karlsen Inuit Ataqatigiinneersoq siunnersuuteqarpoq, Maniitsumi aalisakkerinermut ilinniarfimmik pilersitsisoqarsinnaasoq, inuusuttut nunatsinneersut taamaalillutik tunisassiorfinni ilinniagalittut kinamiunut taarsiullutik sulisinnaaniassammata:

- Doris Jakobsen, naak siorna inatsisartuni akuerisarput aalisakkerinermik ilinniarfimmik naalakkersuisut pilersitsinissaat? Inuusuttunut qaqugu aalisakkerinermut ilinniarfimmut qinnuteqartitsisoqarsinnaava?, Mimi Karlsen (IA) aperaaq.

Aamma atuaruk: Mimi: Inuusuttagut Kinamiunut isiginnaaginnartuutinnagit sulilersitsigit

Doris: Naalakkersuisut sulissutigileruttorpaat
Ilinniartitaanermut naalakkersuisoq Doris J. Jensen (S) naapertorlugu, IA-mit siunnersuut tunngavigalugu Kalaallit Nunaanni inuussutissalerinermi ilinniagaqarnissamut neqeroorutit arlallit ineriartortinnissaannut periarfissat pillugit nassuiaat Naalakkersuisut suliareqqammerpaat.

Doris J. Jensenip akissummini aamma nassuiarpaa, inuussutissarsiortut erseqqissarpaat tunisassiorfinni maskiinanik nutaaliaasunik atuileriartorneq peqatigalugu sulisunik qaffasissutsini tamani ilinniartitsinissamik pisariaqartitsisoqartoq.

- Pingaartumilli tunisassiornermi sulisut piginnaanngorsarnissaannik pisariaqartitsisoqarpoq. Royal Greenland assersuutigalugu ilisimatitsivoq suliffeqarfiup 2015-imi sulisuisa 85 procentii qaffasinnerpaamik meeqqat atuarfianni atuarneq naammassinikuugaat, Doris J. Jensen (S) allappoq, nangillunilu:

- Inuussutissalerinermi ilinniagaqarnissamut neqoroorutinik amerlanernik ineriartortitsinissaq pillugu nassuiaammut suliffeqarfinnut tusarniaanermi tunisassiorfinnut ilinniagaqarnissamik neqeroorutinik aalajangersimasunik aalisakkanik tunisassiorfiit ersarissorujussuarnik kissaateqarput.

- Taamaammat aalisakkanik tunisassiorfinni sulinissamut kissaateqarsinnaasunut toqqaannartumik tunngasumik ilinniarnissaq, Fish-TED Kalaallit Nunaat, maannakkut aamma piareersarneqarpoq.

Aamma DTU oqaloqatigineqartoq
Aamma DTU, Danmarks Tekniske Universitet, suleqatigalugu Issittumi Aalisakkerinermi Teknologimi diplomingeniøritut ilinniarnerup ineriartortinneqarnera aallartinneqarnikuusoq naalakkersuisoq ilisimatitsivoq.

- Ilinniarneq ingeniørinik pikkorissunik aalisakkanik tunisassiorfinni suliaqarsinnaasunik Kalaallillu Nunaata eqqaani imartani pisuussutinik atuilluarnissamut tunngatillugu Kalaallit Nunaanni inuiaqatigiit pisariaqartitsinerannut tunngavoq, Doris J. Jensen (S) allappoq.

Aamma atuaruk: Royal Greenland Kinamiunik amerlanerusunik aallerniartoq