qinersineq
Doris Siumumi siulittaasunngorusuttoq
Siumumi siulittaasup innuttaasut ataatsimuulernissaat sulissutigissavaa, Inatsisartuni Folketingimilu siulittaasoq Doris Jakobsen oqarpoq
Inatsisartuni Folketingimilu ilaasortaq 35-nik ukiuliuk, Doris Jakobsen, Siumumi siulittaasunngorniunnermi sassarpoq.
Innuttaasut ataatsimuulersinneqarnissaat sulissutigissavaa.
- Inuiaqatigiit kissaataat tassalu suleqatigiinnissaq piviusunngortinneqartariaqarpoq, nunatsinni partiit anginerit marluk ullumikkut avissaarluinnarsimasut politikkikkulli isummersortariaasiisa assigiikannersut suleqatigiinnissaat pisariaqalerpoq inuiaqatigiit sakkortusiartuinnartumik avissaartuunnerat toqqissisimannginnerallu qaangerniarlugit, tusagassiutinut nalunaarummi Doris Jakobsen oqarpoq.
Doris Jakobsen Inatsisartunut qinigaaqqaarpoq 2002-mi. Ilinniartitaanermut, kultureqarnermut ilageeqarnermullu naalakkersuisutut 2005-mit 2006-t tikillugu atorfeqarpoq. Folketingimut qinerneqarpoq 2011-mi.
Siumumit suli nalunaaruteqartoqanngilaq qaqagu partii immikkut ataatsimeersuassanersoq.
Doris Jakobsen-ip Aleqa Hammond pingasunngormat tunuarnissaanik kaammattuuteqarpoq.