Pituffik
Doris Pituffik pillugu: Tamanna akisussaqaaq
Siumup folketingimi ilaasortaatitaa Doris Jakobsen oqarpoq Pituffiup sullinneqarnerani sullissinermi maleruagassat nalinginnaasut avaqqullugit isumaqatigiissuteqarsimagunarpoq
Suliffeqarfiup amerikamiunit pigineqartup, Danmarkimili angerlarsimaffilllip, Exelis Servicesip, Pituffiup 30. september 2015-imiit 30. september 2022-mut ingerlanneqarneranut aserfallatsaalineqarneranullu isumaqatigiissut 411 millioner dollarinik (2,4 milliarder koruunit missaannik) aningaasartalik tiguaa.
- Pituffimmi sakkutooqarfiup sullinneqarnerani USA danskit / kalaallillu sulliveqarfiisa sullissinermi atorneqarnissaannik maleruagassat nalinginnaasut avaqqullugit isumaqatigiissuteqarsimagunarpoq. Tamanna Kalaallit Nunaannut Danmarkimullu akisussaqaaq. Aningaasatigut isertitaqarnermi aammalu sullivinnik annaasaqarnermi, Siumup folketingimi ilaasortaatitaa Doris Jakobsen oqarpoq, nangillunilu:
- Akuerineqarsinnaanngilaq nipangiinnarluta danskit / kalaallillu suliffeqarfiutaat pitsaasut Thulemi sakkutooqarfimmiit anisitaanissaat akuerissagutsigu. Eqqarsatigiinnartigit Danmarkip USA-p sakkutooqarnikkut iliuuserisarpassuinut tapersersuisimanera. Danmarkip qanoq isumaqarnera ilisimasariaqarparput. Tassami suli Danmarkip nunanut allanut politikkeqarnerput illersorneqarnissamilu politikkeqarnerput suli akisussaaffigaa.
Taamaammat Doris Jakobseni qallunaat nunanut allanut ministerianut, Martin Lidegaardimut, USA-p Pituffimmi sakkutooqarfiup sullinneqarnerani nutaamik ingerlatsivimmik amerikamiunit pigineqartumut isumaqatigiissuteqarsimanera pillugu arlalinnik marlunngornermi apeqquteqarfigaa.
Atuaruk: Pituffimmi sulisartut suliffitik ernumagivaat
Uani Doris Jakobsenip qallunaat nunanut allanut ministerianut suut apeqqutigisimanerai atuarsinnaavatit:
- Nunanut Allanut Ministeri qinnuvigineqarpoq Danmarki qanoq iliuuseqarniarnersoq, tassami USA-p Thule Air Base-p sullinneqarnissaa pillugu isumaqatigiissutimini nutaami ingerlatsivimmik amerikamiunit pigineqartumik isumaqatigiissuteqarsimammat. Taanna ‘ingerlatsiviusaavoq’ inatsisilerituullu Københavnimi najugaqartup allaffeqarfianiit ingerlanneqarpoq, taamaasillunlu Danmarkip USA-llu Thule Air Base pillugu isumaqatigiissutaannut naapertuunnani.
- Ministerip qanoq isilluni qulakkeerniarpaa Danmarkip Kalaallit Nunaatalu isumaqatigiissut nutaaq USA-p isumaqatigiissutit unioqqutillugit pilersitaata kingunerisaanik aningaasarsiornikkut annaasaqaatiminni taarsiivigineqarnissaat, tassami tunngaviusumik isumaqatigiissutaanikuummat Thulebasemi danskit / kalaallillu suliffissanik pissarsillutillu sullississasut?
- Nunanut Allanut Ministeriaqarfiup qanoq isiornermigut amerikamiut ingerlatseqatigiiffiat nutaajusoq neriorsuitissimavaa Thulebasemi sulliviit pillugit maleruagassat isumaqatigiissutillu naapertorlugit ingerlatsiniarluni, massa isumaqatigiissummiit maanna atuttumiit neqeroorutit affaannarmik akeqartitsinnissamik nassataqarluartut?
- Ministerip ilisimatitsissutigisinnaanerlugu Danmarkip nalunngikkaa ingerlatseqatigiiffik taanna Thulebasemik sullissinissamik isumaqatiissuteqarsimasoq, atortut elektroniskeusut atorlugit alapernaarsuinermik nakkutilliinermillu amerikamiut sakkutooqarfiinik sullissisuummat, aammalu naalakkersuisut ilisimaneraat pissutsit taama innerisa kingunerisaanik sakkutooqarfiup siunissami atorneqarnissaanut qanoq sunniuteqassanersoq?
- Ministerip naammaginartuusorinerlugu USA-p taama isiornermigut danskit USA-p piffissami qanittumi nunani kangimut akullerni sakkutooqarnermi iliuuseqarnerpassuinut tapersuisimanerat danskit kalaallillu Thulemi ingerlatsivituannguata taarnersuarmut ajattorneratigut ‘qujassutigigaa’?
Atuaruk: Thulemi sakkutooqarfiup ingerlannera Vectrus-ip tiguvaa