suliamik nikisitsineq
Doris nutaamik siunnersortitaarpoq
Kalaaleq tusagassiortoq Nuummut utissaaq peqqissutsimut naalakkersuisunut allatsinngoriartorluni
Nutaamik atorfinitsinneqartoq tassavoq Rosa Thorsen, taannalu aggustip aallaqqaataani atorfinissaaq. Taanna ukiuni kingullerni Danmarkimi tusagassiortutut namminersortutut sulisimavoq. Doris Jakobsenimut allatsitut ilaatigut tusagassiorfinnut attaveqarneq akisussaaffigissavaa.
1994-imi naammassisoq
Rosa Thorsen 1994-imi tusagassiortutut naammassivoq, kingornalu tusagassiorfinni arlalinni sulisimalluni, ilaatigut KNR-mi Nutaarsiassaqartitsivimmilu Sermitsiaq.AG-mi, taavalu 2009-mi 2010-milu Siulittaasup Naalakkersuisoqarfiani paasissutissiisartutut tusagassiisartutullu sulisimalluni.
Rosa Thorsen taartaagallartutut atorfinitsinneqarpoq, atorfik suli inuttalerneqarsimanngimmat. Kingornalu naalakkersuisoqarfiup atorfik inuttassarsiuutissavaa, taanna paasissutissiivoq.