Doris Jensen: Ilinniartitaanermut naalakkersuisoqarfik tigummiinnarusukkaluarpara
Siumumi politikeri Doris J. Jensen peqqissutsimut naalakkersuisunngorpoq, kisianni ilinniartitaanermut naalakkersuisoqarfik akisussaaffigiinnarusussimagaluarlugu, Sermitsiaq.AG-mut oqarpoq.
Doris J. Jensen (S) peqqissutsimut ilisimatusarnermullu naalakkersuisunngorpoq, tamatumalu kinguneraa qinigaaffimmi kingullertut ilinniartitaanermut naalakkersuisuujunnaarnera.
Taarsiullugu taassuma parteeqataa Vivian Motzfeldt ilinniartitaanermut naalakkersuisunngortinneqarpoq. Taamaalillunilu Vivian Motzfeldt Tunngaviusumik inatsisissamnut ataatsimiitaliamut siulittaasuujunnaarpoq.
- Ilinniartitaanermut naalakkersuisoqarfik akisussaaffigiinnarusussimagaluarpiuk?
- Suliat aallartikkuusama ingerlaannarnissaat neriuutiginerpaanikuuara. Soorlu ilinniartitaanikkut aaqqissuusseqqineq maanna ingerlanneqartoq, taanna suliaq aallartittoq naammassineqarluni ingerlaannarnissaa neriuutigilluinnarpara. Vivian Motzfeldtip suliat pitsaasut ingerlateqqissagai naatsorsuutigalugu tatigaara. Soorunalimi ilinniartitaaneq uummateqarfigigakku uggoralugu oqarsinnaavunga, taamaakkaluartoq suliassamut nutaamut qilanaarpunga, Doris J. Jensen akivoq.
- Pakatsivit?
- Naamik, oqarsinnaanngilanga pakatsillunga, Doris J. Jensen naatsumik oqarpoq.