Ilinniarneq
Doris Jakobsenip angutit ilinniartalertikkusuppai
Angutit amerlanerusut ilinniartittalernissaanut tunngatillugu ilinniartitaanermut naalakkersuisup Savalimmiut Islandilu isumassarsiorfiginiarpai
Arnat ilinniaqqittartut amerlassusaannit angutit affaannaannik amerlassusillit ilinniaqqittarput. Naatsorsueqqissaartarfiup kisitsisaataasa nutaat tamanna takutippaat.
Ilinniartitaanermut, kultureqarnermut, ilisimatusarnermut ilageeqarnermullu naalakkersuisup, Doris Jakobsenip (S) taamatut equngasumik inissisimaneq iluarsitikkusuppaa.
- Kalaallit Nunaanni annertunerusumik ilinniarfinni ilinniartut amerliartuinnarput, taamaakkaluartorli ajoraluartumik kisitsisit takutippaat amerliartuutaasut tamangajalluinnarmik arnaasut. Angutit amerliartornerat annikitsuaraavoq.
Atuaruk: Arnat ilinniaqqittartut amerlanerupput
Nunat Avannarliit Killiit Siunnersuisoqatigiivisa ukiumoortumik sammisaqarlutik ataatsimeersuarneranni ukioq manna angutit unamminartitaannik sammisaqarfiusumi Doris Jakobsen (S) saqqummiigami taama oqarpoq.
- Angutit ilinniartitaanerat isiginiarneqartariaqarpoq pingaaruteqarporlu Savalimmiuni Islandimilu ajornartorsiutit assingusut takussallugit taamaasillutalu suliniarnissatsinnut isumassarsiorfigalugit, taanna saqqummiinermini naqissusiivoq.
Doris Jakobsenip aamma angutit inuusuttut peqataajartulersut maluginiarnerarpaa.
- Qujanartumik siunitsinni neriunartoqarpoq, soorlu nukappissat meeqqat atuarfiat naammassillugulu ilinniarlutik aallartittartut amerliartorput, Doris Jakobsen (S) ataatsimiinnermi oqarpoq, taanna ukiormanna Thorshavnimi pivoq.