Kulturikkut aaqqissuussaq
Doris Jakobsen nunat avannarliit kulturikkut suliniuteqarnerannut Londonimi peqataasoq
Ilinniartitaanermut, Kultureqarnermut, Ilisimatusarnermut Ilageeqarnermullu naalakkersuisoq, Doris Jakobsen, nunat avannarliit kulturikkut suliniuteqarnerannut: Nordic Matters, tallimanngornermi Londonimi ammarneqartoq najuuffigaa.
Saqqumiineq 2017 tamaat ingerlassaaq, siunertaallunilu kulturi atorlugu inuussutissarsiornermi ataatsimut ineriartortitsinermi misilittakkanik paarlaasseqatigiinnissaq.
- Kultureqarnermut Naalakkersuisunngoqqinnerma kingorna kultureqarnermi peqatigiiffinniit assigiinngitsunit ataatsimut oqariartuutit tusartarnikuuvakka: ”Kalaallit Nunaanni kultureqarneq pitsanngorsarsinnaajumallugu nunani allani inuussutissarsiornikkut ineriartortitsinissaq Kalaallit Nunaanni atorfissaqartipparput. Neriuppunga saqqummersitsineq taanna tamassumunnga tapersiissasoq, Ilinniartitaanermut, Kultureqarnermut, Ilisimatusarnermut Ilageeqarnermullu naalakkersuisoq, Doris Jakobsen, tusagassiuutinut nalunaarummi oqarpoq.
- Nunani Avannarlerni nunallu allat sinnerini kulturimik ingerlatsinermi pissanganartorpassuarnik pisoqarpoq. Kulturi atorlugu inuussutissarsiorneq pillugu nunani allani ilisimasat iluaqitigisariaqarpagut, Doris Jakobsen nangippoq.
EU-mi kulturikkut nutaaliornermilu ingerlatsinermi biilinik sanaartortunut sanilliullugu pingajuat avillugu amerlanerusunik sulisoqarpoq. Tassunga peqatigitillugu immikkoortumi sulisut suliffissuarnut allanut sanillugugu inuusuttorujussuupput, Europamilu aningaasaqarnikkut siunissami aaqqiissutissat ilaattut isigineqarluni.
Nunani avannarlerni filmit, nipilersorneq, ilusinersuineq, atuakkiorneq qaraasiakkullu pinngualiorneq milliardikkaanik isertitsiviusarput.
Nordic Matters Londonimi Southbank Centre-mi ingerlanneqarpoq, ingerlatallu tassaallutik isiginnaartitsinerit, tusarnaartitsinerit, atuakkiorneq pillugu oqalugiarnerit, illuliortaaseq aammalu ilusilersukkanik sanalukkanillu saqqummersitsinerit. Aamma kulturimik ingerlatsinermi ilisimaneqartut eqqumiitsuliortullu nunanit avannarlerneersut peqataaffigisaannik isumasioqatigiittoqartassaaq saqqummiisoqartassallunilu, ilaatigut Julie Edel Hardenberg Kalaallit Nunaannit peqataavoq.
Aaqqissuussineq Londimi Southbank Centre-mit aningaasalersorneqarpoq, Nunanilu Avannarlerni Ministerit Sinnersuisoqatigiiffiata suliniut 5 millioninik tapiffigivaat. Tamassuma saniatigut nunani avannarnerlerni kultureqarnermut aningaasaateqarfiit kiisalu Nordisk Kulturfond tapersiipput.