Doris Jakobsen kingornussassat pillugit apeqquteqarpoq

Kujataamiup arnap qinersisartut ilaata, folketingimi ilasortaq Siumumeersoq Doris Jakobsen, ilisimatissimavaa ataatami Nanortalimmi toqunerata kingorna kingornussassanik suliarinninneq ukiuni aqqanilinni maanna ingerlareersimasoq suli naammassineqarani.

- Suliaq pinartorsuartaqanngilaq, tassami kingornussisussat akornanni isumaqatigiinngittoqanngilaq, allanilluunniimmi suliamut kinguarsaataasinnaasunik suliassartaqarnani, Doris Jakobsen paasissutissiivoq.

Paasissutissat qinersisartumit arnamit Doris Jakobsenip pissarsiarisimasai naapertorlugit suliaq Nanortalimmiit Narsamut, Qaqortumut maannalu tassa Sermersuumi eqqartuussiveqarfimmut ingerlasimavoq, aatsaallu suliap naammassinissaa pillugu aalajangiiniarnermut ataatsimiigiaqqusinermut siullermut qaaqqusisoqarsimalluni, ataataasup toquneraniit ukiut aqqanillit qaangiuttut.

Doris Jakobsen: Qimanneqartunut eqqunngitsuliorneruvoq
Tamatuma kinguneranik Doris Jakobsenip danskit inatsisinik atortitsinermut ministerianut, Socialdemokraatineersunut Mette Frederiksenimut suliaq saqqummiuppaa, nassiuaanneqarnissanilu piumasaralugu.

- Eqqartuussivimmi kingornussassat pillugit suliaq nalinninnaasoq ukiuni aqqanilinni suliarineqarsimanera ingasappallaaqaaq. Toqukkut qimanneqartunut eqqunngitsuliorneruvoq, isumaqarpungalu Eqqartuussiveqarnermut Ministeri taamatut pisoqaqqinnginnissaa qulakkeerniarlugu piaartumik iliuuseqartariaqartoq. Neriuutigaara kingornussassat pillugit Kalaallit Nunaanni eqqartuussivinni suliaqartarnerit Danmarkimi pisartuniit quleriaammik sivisunerusumik nalinginnaasumik sivisunerusanngitsut, Doris Jakobsen oqarpoq.

Doris Jakobsenip inatsisinut atortitsinermut ministerimit ilanngullugu paaserusuppaa Kalaallit Nunaanni Danmarkimilu suliat taama ittut assigiinngissutsumik suliarineqartarnersut.