Narsaq
Doris Jakobsen avaanngunartumik sianerfigineqareerluni tupaqqasoq
Folketingimi ilaasortaq Siumumeersoq Doris Jakobsen Kujataani ataatsimiisitsisaarnermi nalaani akerartorneqarluni sianerfigineqareerluni isumaqarpoq politikerit illersorneqarnerat annertunerusariaqartoq
Siumumeersoq Doris Jakobsen piffissami matumani Kujataani Folketingimi ilaasortaanini tunngavigalugu innuttaasunik ataatsimiisitsisaarluni angalasoq pingasunngornermi ullaakkut toqqissiviilliortinneqarpoq.
Oqarasuaataanummi angut kamattupilussuaq sianerpoq.
- Tupannermut oqaasiisaa ilarpassui paasinngilakka, kisianni oqaluppoq toornaarsuk, tiaavulu folketingipalaaq, kisianni aamma Narsamiinnera arlaatigut eqqartorpaluppaa, Doris Jakobsen Sermitsiaq.AG-mut oqaluttuarpoq.
Doris Jakobsenip sianerfigineqarnini toqqissisimanarinagu politiinut saaffiginnippoq, kisiannili ilisimatinneqarpoq angutip sianertup normua normunik paasiniaavinni allassimanngippat, kiisalu navianartorsiortinneqanngippat, taava 10.000 koruuninik politiinut akeqassasoq normup kimit pigineqarnerata paasiniarnissaa.
- Taarsiullugu siunnersorneqarpunga nikanarsarneqarsimasutut eqqartuussivimmut tunniussisinnaasunga, Doris Jakobsen oqaluttuarpoq.
Doris: Toqqissilluta sulisinnaasariaqarpugut
Doris Jakobsen isumaqarpoq Nunatsinni politiit politikerit siorasaarneqartillugit suliassamik pimoorussinerullutik tigusisinnaasariaqartut.
- Nunatsinni qinikkanut taama ajornanngitsigisumik iliuuseqartoqartillugu politiit pimoorussinerullutik tigunerusinnaasariaqaraat isumarpunga. Folketingimimi ilaasortat Danmarkimi taama pineqartillugit politiit erngerlutik suliassaq pimoorullugu misissuillutik aallartittarput, Doris Jakobsen oqarpoq, imalu nangilluni:
- Toqqissilluta sulisinnaasariaqarpugut ersiortitaanata. Inuit ataasiakkaat isummertarnerat ataqqivara, kisianni ersiortinneqartarianngilagut taakkunanngaanniit allanik isumaqarnerput tunngavigalugu.