Rødt kort
Dommeri unatartinnissamik sioorasaarneqartoq
K-33-ip Malamukkillu unammineranni isiginnaartoq illersuingaarami dommeri unatarniarlugu sioorasaarpaa
Kalaallit Nunaanni Arsaattartut Kattuffianni siulittaasup Lars Lundbladip uppernarsarpaa tallimanngormat Nunatsinni arngutit arsaallutik pissartanngorniullutik K-33-ip Malamukkillu unammineranni dommeri isiginnaartumit sioorasaarneqarsimasoq unatarniarlugu. Pissusilersornera ingasappallaaqimmat isiginnaartoq isiginnaartarfimmit peersinneqarpoq.
– Tamanna pivoq unamminerup immikkoortuani siullermi, dommerilu muminnissamut siggarmat ingerlaannaq qanoq pisoqarsimaneranik ilisimatinneqarpunga. Unamminerup unitsinnissaa kinguartinnissaalu isumaliutigigaluarpagut. Aalajangerpugulli isiginnaartoq isiginnaartarfimmit peersinniarlugu. Angut aalakoorpoq unamminermillu akornusersuivallaarluni, Lars Lundblad Sermitsiaq.AG-mut oqarpoq.
Taanna oqarpoq pisimasoq tamaanga killeqartoq.
K-33-ip FC Malamuk-llu unamminerat 1-1-imik inerneqarpoq, tassanilu dommeriuvoq Daniel Jakobsen, Nuummeersoq.
Ullumi arfininngornermi, paasineqassaaq kikkut semifinalimut anngunnersut.
Aamma atuaruk: B-67 semifinalimut annguppoq
Daniel Jakobsen Sermitsiaq.AG-mut oqaluttuarpoq taamatut misigisaqaqqissaguni dommeriusarnini unitsinniarlugu:
– Suaartaatigineqartut nuanneeqaat. Soorlu imatut: Unatassavakkit toqullutit. Taamatut pineqarusunngilanga, Daniel Jakobsen oqarpoq.