Naanguna aasaq?
DMI: DMI: Sila kissatsilerpoq
Junimi Nunatsinni silap kiassusaa naliginnaasumik inissisimassasoq, DMI-mit nalunaarutigineqarpoq
Nuummiut iterput sila minus 1 grade-mik pueqqortoq. Ilulissani aamma suli qimussertarput. Aasaq Nunatsinnut apuunniiaasaarpoq Finlandimilu Nunatta avannarpaseqataani aatsaat taama kiatsigaaq. Neriuutissaqartugulli, DMI-miit nalunaarput.
Nunatsinni piffissami sivitsortumi pueqqorneranut pissutaavoq anorip imaaniit sammiveqarnera.
- Kalaallit Nunaat immamit nillertumit kaajallanneqarsimavoq. Taamaammat anori imaaneeraangat pueqqortarpoq, DMI-mi silasiortoq Jesper Jensen Sermitsiaq.AG-mut oqarpoq.
Putsersinnaavoq
Pueqquinnartussaanngilarligooq.
- Ataasinngornermi kujataani qulinik kiappoq silaannarlu kissartoq kitaata sinneranut siaruaakkiartorumaarpoq. Ilimasaarupput malillugu Nuummi sisamanngorpat qulinik aqqaneq marlullu akornanni kiassaaq, Jesper Jensen oqarpoq.
Taamaattoq oqaatigisinnaannginnerarpaa aasap sinnerani silap qanoq ikkumaarnissaa.
- Takusinnaasakka malillugit juunimi silap kiassusaa naliginnaasumi inissisimajumaarpoq. Taamaakkaangat qulit aqqaneq marlullu akornannik kiattarpoq. Silaannarli kissakkaangat anorillu sammivia imaaneeraangat putsilersinnaasarpoq taamalu aamma pueqqorsinnaasarluni, Jesper Jensen oqarpoq.