aasalerpa?
DMI: Sila kissakkallarnavianngilaq
Maajimi sila pisarnerminit kiannerusimasoq, DMI-mit ilisimatitsissutigineqarpoq
Nuummiut Nunatta qeqqani sumiiffiit arlallit ulluni makkunani itertarput issisiut 0-lup missaaniittoq. Biiliutillit arlallit igalaanik ullaakkut sermiiaaqqaarlutik sapaatip akunnerata naanerani biilerput. DMI-miillu silaannaap qanittumi kiannerulernissaa ilimasaarutigisinnaanngikkallarpaat.
DMI-mi silaannaap kissassusaanik uuttukkat katersorneqarfianni takuneqarsinnaavoq naliginnaasumik maajip qaammataani Nuummi 0,6 grademik kiattartoq. Ukiormanna agguaqatigiisillugu 1,6 grademiissimavoq. Sulili tassa snittaallertarlunilu sila pueqqoqattaarpoq.
- Sapaatit akunneri marluk siumut ilimasaarissagutta kissannissa suli ilimanaateqanngikkallarpoq. Ullunulli taama amerlatigisunut ilimasaarut nalorninarsinnaasarpoq, DMI-mi silasiortoq Kirsten Nordbjerg Sermitsiaq.AG-mut oqarpoq.
DMI-mit aamma oqaatigineqarsinnaanngikkallarpoq aasamut Nunatsinni sila qanorissanersoq, qularutiginngilaalli silaa qaquguunersoq kissallarumaartoq.