DMI: Sapaammi Nuummi sila pitsaanerulissaaq
Arctic Winter Gamesimik aaqqissuussisut kiisami isumallualaarsinnaalerput
Naatsorsuutigineqarpoq sapaammi ullup qeqqata missaani Nuummi sila pitsaanerulissasoq, anorlerpiarunnaarluni perserpiarunnaarlunilu.
Taamatut paasissutissiivoq Danmarks Meteorologiske Institutip Kangerlussuarmi silasiorfiani silasiortoq Janne Hansen.
Iluatsitsineq
Taamaasilluni Arctic Winter Gamesimik aaqqissuussisut kiisami isumallualaarsinnaalerput, siullermik issittormiut unammiuaarnissaat sioqqullugu aputaasanneranik ajornartorsiuteqariarlutik kingorna nittaalartalimmik anorersuarnera pissutigalugu peqataasussat timmisartuunneqarnerat kinguaattoormat.
Sila allanngorartoq
Naluneqanngitsutut kalaallit Nunaanni sila allanngorartuummat, silasiortut sapaatip akunnerata tulliup aallartinnerani, unammiuaarnerit ingerlanneqarneranni, silassap siulittuutiginissaanut mianersorput.
– Silali allanngorassagunarpoq. Ataasinngornerup annersaani silagissagunarpoq, unnuinnartorli marlunngornikkullu qularnanngitsumik apeqqilissaaq. Ississusaalu ukiup taamaasineranut nalinginnaasuussaaq, tassa tallimat qulillu akornanni issilluni, Janne Hansen naliliivoq.
Anorleqisoq
DMI-p siulittuinera eqqorluinnarlugu tallimanngormat ualikkut 15.00 missaani sakkortuumik anorlileriartulerpoq. Anoraasuarnerit sakkortunersaagamik sekundimut 30 meterit missaannik sakkortussuseqarput - tamannalu natsimanertut taaneqartarpoq anorersuartut sakkortutigisunik anoraasuartarluni.
Anorikilliartorpoq
– Sapaammi ullaap tungaani anorikilliartulissaaq, taamaasinerani nunasarnereerluni niggilissammat. Apinera aamma sunnerneqassaaq. Naatsorsuutigaaralu sapaatip naajartulernerani silagissiumaartoq, silasiortoq nassuiaavoq.