siunissami sila
DMI-p ukiut 85-t qaangiuppata silassaq siulittuutigaa
Kommunini aamma nunami allanngutsaaliukkami siunissami sila pillugu unammilligassat nalunaarusiat arfinillit allaatigaat
Nunarsuaq kissatsikkiartuleruttorpoq, Kalaallit Nunaannilu kissatsikkiartorneq nunarsuarmi piffiit ilaanni ersarinnerpaat ilagissavaat.
Tamannalu Namminersorlutik Oqartussanut aamma kommuninut atortulersuinissamut aamma sanaartornissamut pilersaarusiornissaannut annertuumik unammilligassaqartitsivoq. Saniatigullu nunalerinerup aamma aalisarnerup tungaatigut ilaatigut arlalinnik periarfissaqalersitsissaaq, dmi.dk taama allappoq.
Paasisat pingaarutillit
Namminersorlutik Oqartussat ukiuni makkunani silap pissusianut naleqqussarnissamut tunngasunik paasissutissiinernik suliaqarput, aammalu kommunit tunngavigalugit siunissami silamut qulakkeerisumik pilersaarusiornissamik nalunaarusianik arfinilinnik nutaanik pinermigut pingaarutilinnik paasisanik peqalerpoq.
Issittumi silap pissusiata allanngornera annertunissaa aamma inuit inuuniarnermerat, uumasut naasullu ersarissumik allanngussasut, DMI-p siulittuutigaa. Issittumi inuiaqatigiit aamma siunissami silap pissusianut naleqqussarnissaminnut annertuumik unammilligassaqassapput.
Naatsorsuinerit nutaat
- Kalaallit Nunaanni silap pissusiata allannguutigisinnaasaat DMI-p naatsorsuinermut periusaat atorlugu naatsorsuinerit nutaat aallaavigalugit allaatigaagut. Uku ukiut hunnorujulikkaat ineriartornerat aallaavigaarput, aammalu Kalaallit Nunaanni silap pissusiata allannguutissaanik naliliinigut FN-p naatsorsuinermut atortagaanik tunngaveqarput, ilisimatusarnermut aqutsisoq Jens Hesselbjerg DMI-mit oqarpoq.
Sila pillugu paasisat piffinnut arfinilinnut tunngasuuvoq: Kommunit Qaasuitsup, Qeqqata aamma Kujalleq, Nationalparki, Kommuneqarfik Sermersuup kitaatungaa aamma kommunip kangiatungaa.
Ukiut 85-t
DMI-mi ilisimatusartut klimamodellit aamma DMI-p qarasaasiaa atorlugit Kalaallit Nunaanni ukiut 15-t, 35-t, aamma 85-t qaangiuppata sila qanoq pissuseqarnissaa assigiinngitsut marluk aallaavigalugit naatsorsorsimavaat.
Ilisimatusartut Namminersorlutik Oqartussanik suleqateqarlutik katillugu nalileeriaatsit 66-t assigiinngitsut, tamarmik immikkut ullumikkut aamma siunissamik silap pillugut oqaluttuartut atorsimavaat: Ukiukkut ullut aakkiartorfiusut, qeriuaannartup aakkiartorneri, immap sikuata issussusaa, aputeqassuseq, apummik iminngortoq, naasut talliartornerisa sivisussusaat, aputip sialuullu annertussusaat, nunap panernera, ippernaqarnerup sivisussusaa il.il.