nakkutilliineq
DMI-p satellitsi sikunik alapernaarsuut iluaqutigissavaa
Satellitsi Sentinel 1a, sisamanngorpat Fransk Guyana-mit qullartinneqassaaq, taanna satellitsit arlalissuit nunarsuarmik paasissutissanik katersuisussat siullersaraat
Nunarsuup alapernaarsorneqarnissaanik europamiut suliniutaasa Kopernikus-ip ilaatut satellitsi nutaaq siulleq qullartinneqassaaq - suliniut tamanna milliardilinnik akeqarpoq, nunarsuarpullu satelltsitigut tamakkunatigut alapernaanneqassaaq, assersuutigalugu pinngortitap nukissuinik ajunaarnersuaqartillugu timmisartumilluunniit nakkartoqartillugu assinik uppernarsaataasinnaasunik pilersuillutik.
Danmarks Meteorologisk Institut-imi, DMI-mi, Sentinel a1 satelltsip qullartinneqarnera nuannaarutigineqarpoq.
– 2000 sioqqullugu Kalaallit Nunaata imartaa timmisartut atorlugit sikusiorneqartarpoq. Tamanna ullukkut silagitsillugulu pitsaanersaavoq, silarlutsilluguli satellitsit radarikkut assilisaat, sila qanorluunniit ikkaluarpat ulloq unnuarlu pitsaasuujuaannartut, pitsaanersaapput, DMI tusagassiorfinnut nalunaarutikkut allappoq.
Pingaartumik DMIs Center for Ocean og Is-imi sulisut sikut sumiissuseriornerannut Nunattalu imartaata alapernaarsorneranut Sentinel a1 satellitsimit paasissutissat atortarssavaat.
Ullumikkut sikunik alapernaarsuinerminni canadamiut satellitsiannit Radarsat-2-mit radarikkut assilisat atornerusarpaat,siusinnerusukkullu satelltsi Envisat tassunga tapertaralugu atorneartarsimavoq.