sisoraatinik oqilaniunneq
DM-imi sprintstafetimi kalaallit bronzenapput
Sisoraatinik oqilaniulluni Danmarkimi pissartanngorniunnermi sprintstafetimi Bjarne Hansen Aka Olsenilu bronzenapput
Sisoraatinik oqilaniulluni DM-eqarnerani tallimanngormat sprintstafetimi unammisoqarpoq - DM ukioq manna Norgemi Kvitåvatnimi ingerlanneqarpoq.
Sprintstafetimi marlukkaarlutik iligiiaat tamarmik 5 x 1,2 kilometerimut arpattarput. Aappa qangatuut aappaalu sukuutsertutut arpalluni.
Kalaallit normu 3-ngorput
Kalaallit Nunaannit inuusuttut marluk SSP-meersut peqataapput, pissartanngorniunnermi angutit inersimasut unammillugit.
Københavns Skiklubimeersut normu 1-iullutillu normu 2-upput, normu 3-ngorpulli 13-iinnarnik ukiulik Bjarne Hansen, 17-iinnarnillu ukiulik Aka Olsen, Sisimiuneersut.
Sungiusaasoq napparsimavoq
Normu 6-inngorput SSP-mit holdip aappaa, Nukannguaq Olsen aamma Noah Mikaael Noahsen.
Pilersaarutit malillugit Martin Møller Øystein Slettemarkilu iligiillutik peqataasussaagaluarput, Slettemarkili nuakkami peqataasinnaasimanngilaq. Taamaattumik Martin Møller ulloq taanna unammeqataanngilaq.
Sisoraatinik oqilaniulluni Danmarkimi pissartanngorniunnermi ukioq manna kalaallit amerlasuunik medaljenapput.