DK-mi partiit annersaasa sisamaat: Ministeri kukkussuteqarnersaavoq

– Nalunaarusiakkut eseqqissarneqarpoq nutaamik tunngaviusussat Naalakkersuisunut saqqummiunneqarsimannginnerannut politikkikkullu akuersissutigineqarsimannginnerannut inatasisitigut ersarissumik kukkussuteqartoqarsimasoq. Kalaallit pisimasumut malinnaasimanngilluinnarput.

Taamatut oqarpoq Enhedslistenip Kalaallit Nunaannut oqaaseqartartua Christian Juhl, Thulemut tunngasup ingerlarnganik Naalakkersuisut eqqartuussissuserisumik misissuisitsinerat atuareerlugu.

Danmark kukkussuteqarnersaavoq

Taassumali erseqqissarpaa kukkussuteqarneq annerpaaq Nuummi pinnani Københavnimi pisimasoq.

– Kiffartuussinissamik isumaqatigiissutip Exelis Servicesimut tunniunneqarneranut pisuussuteqarnersaavoq taamanikkut qallunaat nunanut allanut ministeriat (Martin Lidegaard, aaqqiss.). Taassuma qallunaallu nunanut allanut ministereqarfiata neqerooruteqarnissamut atortussat allanngortissimavaat, taamaasilluni piumasaqaataajunnaarluni suliassaq tamanna qallunaat imaluunniit kalaallit selskabiannit ingerlanneqartassasoq.

Martin Lidegaard kukkorujussuarpoq neqerooruteqarnissamut kalaallit tunngavii atorunnaarlugit, amerikarmiut tunngaviisa allanngortinnissaat akuersissutigigamigit.

Sakkutuut tikeraartuinnaapput

– Enhedslisten naapertorlugu neq3erooruteqarnissamut piumasaqaataasarsimasut qallunaat naalakkersuisuisa Martin Lidegaardillu aalajangiusimasariaqarsimagaluaraat, EU-milu suliassiissuteqarnissamut sioorasaarutit soqutiginngiinnarlugit. Taamaasiorsimanngillat. Taamaasilluni Thule Air Basemi kiffartuussinissamut isumaqatigiissutip annaaneqarneranut imminnut annertuumik akisussaassusilerput, Christian Juhl oqarpoq.

Politikerip saamerliusup pisariaqarpat Thulemi sakkutooqarfiup atorneranut amerikarmiut akiliisalernissaannik kalaallit piumasaqaataat taperserpaa.

– Eqqaamaneqassaaq amerikarmiut Kalaallit Nunaanni tikeraartuinnaammata.