internetti
Diskomut immap naqqatigut kabeleqalissanngikkallarpoq
Siulersuisut aalajangiuppaat søkabilimut aamma radiokædimut aningaasaleeqqinnissap aalajangiiffigineqarnissaa aatsaat 2016-p aallartinnerani pissasoq
Tele-Postimip siulersuisui suliffeqarfiup søkabeli aamma radiokædi tallineqarnissaannut aningaasaliissanerlutik aalajangiinissaminnut kinguartitsigallarput.
Siulersuisut 2016-ip aallartinnerani tamanna oqaluuserissavaat, oqallisiginissaanilli kinguartitsineq søkabelip pilersinneqarnissaa ukioq ataatsimik kinguartinneqarneranik kinguneqarpoq, Tele-Post taama ilisimatitsivoq.
Aningaasaliissutit annertuut
Tele-Postip siunissami annertuumik aningaasaliinissaa kinguartitsinermut peqqutaavoq.
Nuummit Aasiannut søkabelip tallineqarnissaa akisuvoq, saniatigullu aamma pilersaarutaavoq radiokædi Aasiannit Ilulissanut tallineqarnissaat, taamaalilluni attaveqaat Uummannamut Upernavimmullu anngutissammat.
Aningaasanik annaasaqassasoq
Illuatungaanillu Tele-Postip Nunatsinni inoqarfinnut innuttakinnerusunut internetimik siammarterineq aningaasatigut ajunaarutigisarpaa. Søkabeli radiokædilu pilersinneqarpata amigartoorut suli annerulissaaq.
Aammalu mobilikkut attaviit namminersortunut tunniunnerisigut Tele-Post isertitakinnerulissanera naatsorsuutigineqarpoq, siunissamilu mobilikkut attaviit aqqutigalugit isertitassat internetikkut atuinermut akikillisaataasinnaassanatik.
Naammattumik tunngavilersugassat
Taamaattumik aningaasaliissutit taamak annertutigisut siulersuisut aalajangiiffiginissaannut naammattumik tunngavilersuutitaqarnissaat pisariaqarpoq, maannamullu paasissutissanik suli annertunerusunik pisariaqartitsisoqarpoq.
- Pineqartunut aningaasaliinissaq Tele-Postimi tapersersornartipparput. Aningaasaliissutilli taamak annertutigisut aalajangiiffiginissaat naammattumik tunngavilersuutitaqarnissaat pisariaqarpoq, siulersuisuni siulittaasoq Stine Bosse oqarpoq.
- Suli ilisimanngisat arlaqaramik. Aningaasaliinissaq annertooq aammalu mobilitigut sullissineq siunissami qanoq isikkoqassanersoq nalunarmata. Tele-Postimut isertitakinnerulermik nassataqassaaq, taamaattumillu ukiuni tulliuttuni aningaasartuutissagut nalilersoqqittariaqarpagut. Apeqqutaanngilarli aningaasaliisoqassanersoq, apeqqutaaginnarpoq qaqugu aningaasaliineq pissanersoq, taanna ilanngullugu oqarpoq.
Siusinnerpaamik 2017-mi
Kinguartitsinerup malitsigisaanik aningaasaliinissat siusinnerpaamik 2017-mi pisinnaapput.
Aalajangiinerup kingorna aatsaat minnerpaamik ukiup affaa qaangiuppat søkabelip inissinnissaa aallartissinnaavoq, taamaammat immap naqqatigut kabeli aamma radiokæde 2016-mi aasakkut sanaartorfiusartumi suliassanut angumerineqarsinnaanngillat.
Atuaruk: Tele-Post: Qasigiannguanut imaatigut kabeli