takornariaqarneq
Diskobugtimi sakkortuumik arpattoqassaaq
Arpattartut pinngortitaq timersorfigissallugu periarfissaqarluartoq eqqumaffigilersimavaat. Aasaru Diskobugtimi aggustip qaammataani nunarsuarmi tamalaaneersunit peqataaffigineqartussami trailløberneq siullermeerluni ingerlanneqassaaq.
Sermersuarmi arpanneq, Ilulissat aqqusernani sukkasuumik arpanneq kiisalu Store Aqanami Skarvefjeldimilu qummukajaakkut arpanneq.
Pilersaarut arlaannut artornakujussinnaanngaluarpoq sakkortuumillu arpattartuulluni nuannissaqaaq.
Taamaammat Diskobugtimi arpatitsisoqarnissaanut peqataarusuttut amerlapput, arpatsitsineq aatsaat pernaammik nunani tamalaaneersunut neqeroortutigineqarpoq.
Løberejser.dk Arctic Friend suleqatigalugu aggustimi arpatsitsinissaq aaqqissuunneqarpoq.
- Pinngortitami arpattarneq soqutigineqaleraluttuinnarnera malugisimavarput, pinngortitamimi arpanneq unammillernarlunilu misigisaq immikkuullarissuuvoq. Kalaallit Nunaanni arpatitsinissaq misigisaqarfiulluarsinnaasusutut sakkortunerpaamillu arpaffiussaasinnaasoq isumaqarpugut, Løberejser-mi suleqataasoq, Jørn Andersen, oqarpoq.
Ullormut 20-30 km
Diskobugtimi arpatitsinissaq aggustiimi ingerlanneqartussaq Trail Run Camp 2017-mik taaguuserneqarsimavoq. Arpattartut Kangerlussuarmiik 36 kilometerinik isorartutigisoq aallarniutigissavaat. Tamatumalu kingorna arpattartut Ilulissani Sermermiunut Store Aqanamullu arpassallutik.
Arpaffissat aaqqissuussallu sumiiffinni assigiinnginngissutaarneranut peqqutaatinneqarpoq arpattartut kulturikkut oqaluttuarisaanikkullu misigisaqartinneqarnissaat.
Atuaruk: Assit takukkit: Nuummi stafetsertitsinerit arfinilissaanni iligiiaat 220-t ilaasut
- Kalaallit Nunaata oqaluttuarisaanera immiikkuullarissuusoq Jørn Andersenip oqaatigaa. Jørn Andersenillu amerikamiut, franskit canadamiulli danskillu peqataatitaqarnernissaat naatsorsuutigivaa.
Najugaqartut arpaqataassapput
Diskobugtimi sakkortuumik arpatsitisoqareerpat naggataarutaasumik Ilulissani najugaqartullu orienteringsløbertinneqassapput