isumaqatigiissutit
Disko Line nalilersorpaat
Innuttaasut ataatsimiipput akerliussutsimillu takutitsinissamik pilersaarusiorlutik angallannermuttunngasut naammagiinnarsinnaajunnaarlugit. Politikkikkut suliniarneq aamma aallarteruttorpoq
Disko Linep ilaasunik Qeqertarsuup Tunuani kujataailu angallassinera ilaasut pollitikierillu isornartorsiorpaat ukiortaamiit kiffaartuussinissamut isumaqatigiissutinik isumaginnittunngornerat naammaginagu.
Angallassiniarneq silarloqattaarneranit akimmisaartinneqarsimavoq. Ilaatigullu ilaasut sapaatip akunnera sinnerlugu kinguaattooreerlugit ingerlaqqissinnaalersarput.
- Sila kialuunniit naalagaaffiginngilaa taannami kinguaattoorutaammat. Taamaattoq kinguaattoortoqartillugu paasissutissiisarneq naammaginanngilluinnarpoq. Amigarluinnarpormi, Qaasuitsup Kommuniani kommunalbestyrelsemi Siumut sinnerlugu ilaasortaq Kristian Broberg Qeqertarsuarmeersoq oqarpoq.
Atuaruk: Disko Line nakkutigineqartorujussuuvoq
Angalasut Disko Linemut siarngussimaqaat arlallillu akissutit pissarsiatik naammaginagit attaveqarnermut naalakkersuisumut Martha Lund Olsenimut Siumumeersumut toqqaannartumik attaveqartarsimapput taassuma Naalakkersuisuniit tunuarnissaa sioqqullugu.
- Arlalinnit toqqaannartumik saaffigineqarpugut, ilisimatitsissutigaarpulli pissutsit pillugit sukumiisumik erseqqissumillu nassuiaasoqarnissaa pisariaqartoq saaffiginnissutit nalilersuinermi ilanngunneqassappata, attaveqarnermut naalakkersuioqarfik ilisimatitsivoq.
Akerliussutsimik takutitsineq
Politikkikkut nalunaartoqarnissaa sioqqullugu Qeqertarsuarmi innuttaasut ataatsimiipput. Tamanna sapaatip akunnera kingulleq pivoq peqataasullu oqariartuutaat paatsuugassaanngilaq.
- Misigisimavugut ukiortaap kingorna sullinneqarnerput ajorseriartoq. Maanna illoqarfitsinni sumi tamaani oqaluttoqarpoq. Imaatigut silaannakkullu Qeqertarsuarmut angallannerit naammagineqanngillat. Isumaqarpugut timmisartoq atorneqartoq inissisimaffitsinnut naleqqutinngitsoq ukiukkut taartarmat. Innuttaasunik ataatsimiisinneranni aamma anguniarneqarpoq inuit misigisaasa katersornissaat allakkatigut Naalakkersuisunut saaffiginninnermi apuunneqarniassammata, Qeqertarsuarmi ataatsimiisitsinermik aallarniisoq Helga Zeeb oqarpoq.
AG-mi atuaqqigit: