D: Ingerlatseqatigiiffiit inissinneqarlik
Mittarfeqarfiit aamma Kalaallit Airports kattunnissamut eqqarsaataat Demokraatit siulittaasussaannit isornartorsiorneqarpoq
- Ingerlatseqatigiiffiit inuiaqatigiinni qitiusumik inissisimasut marluk politikkikkut aalajangiiniarnermut paasisimasaqanngissusermik ersersitsisumut piffissamik nukimmillu atuerpasinnerannut Naalakkersuisut erngerlutik qisuariannginnerat Demokraatini paasiuminaatsittupilussuuarput.
Demokraatinit Niels Thomsen oqarpoq.
Ingerlatseqatigiiffiit ataatsimut kattunneqarsinnaanissartik piffissamik nukinnillu atuiffigigaat, tamanna Demokraatit annertuumik eqqarsarnartoqartippaat isornartoqartillugulu.
- Suliffeqarfiit taakku marluk pingaarnertut suliassatik aalluttariaqarpaat suliassat aalajangiisinnaassuseqarfiginngilluinnakkatik pinnagit, paragraf 37 naapertorlugu apeqquteqaammi allappoq.
- Tamanna Naalakkersuisuni politikkikkut siulersuinerup sanngiinneranik ajoraluartumik takutitsivoq, tamannalu erngertumik aaqqiissuteqarfigineqartariaqarpoq, Niels Thomsen oqarpoq