Namminersorlutik Oqartussat
Digitaliseriinermut Aqutsisoqarfik nutaamik pisortartaassaaq
John Siegstad Digitaliseriinermut Aqutsisoqarfimmi pisortanngussaaq
Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik aqutsisoqarfimmi pisortatut atorfik John Siegstadimut neqeroorutiginiarlugu aalajangerpoq.
Taanna Tele-Postimi pilersaarusiornermut pisortaasimavoq, Namminersorlutik Oqartussat tusagassiuutinut nalunaarummi ilisimatitsipput.
- Ukiut 18-it sinnerlugit aqutsisutut misilittagaqareersoq MBA-millu ilinniarsimasoq, isumaqarpugut Digitaliseriinermut Aqutsisoqarfik ingerlateqqinnissaanut eqqorluinnartoq nassaarisimallugu, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmi pisortaq Nukaaraq Møller, tusagassiuutinut nalunaarummi oqarpoq.
John Siegstad suliassaqarfinni assigiinngitsuni aqutsinermut, periusissiornermut teknologeqarnermullu suliaqarsimavoq.