Digitalikkut qinngasaarisarnerit iliuuseqarfigineqarniartut
Atuartut amerlasuut iPADsinik tuniorarneqartillugit qinngasaarisarnerup pinaveersaartinneqarnissaa suliniutigineqartariaqarpoq.
Red Barnet Grønland (Meeqqat Ikiortigit) aamma Det Grønlandske Kriminalpræventive Råd – PiSiu – suleqatigiillutik ajortisaarisarnerit inuillu naapeqatigiittarfiini narrujuummisitsisarnerit pillugit eqqummaariffiginerulersinniarpaat.
Tamanna Chat Paaralugu - Sikker Chat suliniutigineqalerneranut peqqutaavoq.
Nunatsinni meerarpassuit mobilit allallu attaveqaatit atorlugit ajortisaarneqartarnerit allatullu aporaassutaasinnaasunik pissusilersorfigineqartarnerit msigisarpaat. Taamaattumillu iPADsit nunatsnni siammasissumik atuarfinnut eqqunneqarpata, narrujuumminartunik digitaliusumik atortutigut
nassiussuisinnaanerit pitsaaliorniarneqartariaqalissapput. Taamatut isumaqarpoq Red Barnet Grønland (Meeqqat Ikiortigit) aamma Det Grønlandske Kriminalpræventive Råd – PiSiu.
Ikinngutigiilluarneq
-Sakkussat digitaliusut meeqqat ulluinnaannut pitsaaqutaasinnaasorujussuupput, kisianni aamma pingaartuuvoq taamaattut atornerisa narrujuummisitsisarani ikinngutinnersumilli atorneqartarnissaat.
Soorlu Danmarkimi suliarineqartut 1000-it sinnerlugit amerlassuseqartut takutikkaat assinik narrujuumminarsinnaasunik nassiussuisoqartartoq, taamaattullu pitsaaliorumallugit annertuunik
iliuuseqartariaqarpugut. Taamaattumik siunnersuisoqatigiit nuannaarutigaat taaneqartunik pitsaaliuiniarnermi
Meeqqat Ikortigit suleqatigigamikku, Politiit naalagaat Bjørn Tegner Bay PiSiu-mi siulittaasuusoq tusagassiuutinut nalunaarut naapertorlugu oqarpoq.
Suliniummik pilersitsisut ingerlanniagartik tavaat ”Chat Paaralugu – Sikker Chat” suleqatigiillunilu ilinniusiat nittartagarlugu, nunatsinni ilinniartitsisunit atuartunillu tamanit atorneqarsinnaasoq, inerisarniarneqalerpoq.
Kommunit arlaqartut ilinniusiat soqutigalugit tutsiutereersimapput, pilersitsiniartullu siammasissumik suleqatigiinnissaq aggersaassutigaat. Atuarnerit aallartippata atortussatut sananeqartut atuarfinni atorneqarsinnaassapput, maannalu meeqqat atuarfiini assigiinngitsutigut ilinniusiat misilittarneqalereerput, tusagassiuutinut nalunaarummi allassimavoq.
Illoqarfinni nunaqarfinnilu atortut digitaliusut atorlugit uumisaarinerit atuartut misigisarpaat, minnerunngitsumillu niviarsiaqqat akornanni. Tamanna takutinneqarpoq 2014-imi HBSC-mik taallugu misissuinermi, tassanimi atuarneqarsinnaavoq nukappiaqqat 14 procentii niviarsiaqqallu 28 procentii nuanninngitsunik nalunaarfigineqarnernik misigisaqartarsimasut.
MIO-mit nalunaarusiami aamma atuarneqarsinnaavoq, meeqqat amerlasuut kingusinnerusukkut attaveqaatit atorlutik iliuuserisaminnik peqqissimissuteqartartut. Meeqqat 630-iusut akissutaanni peqqissisimanersut apeqqummi, 350-it peqqissimisimallutik nalunaarsimapput.
Attaveqaatinik nuannersumik peqqissumillu atuineq
Iliuuseriniakkami anguniarneqarpoq oqaloqatigiinnermik suleqatigiinnermillu pilersitsinissaq taamallu attaveqaatinik nuannersumik peqqissumillu atuilernissaq.
Tamannalu taamaallaat anguneqarsinnaavoq meeqqat akuliutsinnerisigut, Jonna Ketwa-lu, tarnip pissusaanik ilisimasalik aammalu Meeqqat Ikortigit-mi siulittaasuusoq oqarpoq:
- Pingaartuuvoq suliniarnermi meeqqat peqataatinneqarnissaat. Taamaattumillu ilinniusiorpugut tikkuartuinernik qulaaniillu
oqaaqqissaarinernik imaqanngitsunik, taarsiullugilli atorpagut sungiusaatit meeqqat misigissuseqartumik peqqissumillu ataatsimoornissamut paasinninnissaannut ikorfartuutissat.
Ilinniusiat meeqqat atuarfiini ilinniartitsisut suleqatigalugit suliarineqarsimapput.