DHL Stafet
DHL-stafettimut inissat tamakkerput
Timigissaatigalugu Nunatsinni arpannerit anginersaat Nuummi pisussaq soqutigineqarluarpoq
DHL-stafettimi Nuummi juunip tallimaani pisussami iligiit 125-it nalunaarsimalerput. Arpannermik aaqqissuisuusoq Tele-Post nalunaarpoq peqataanissamut inissat maanna tamakkerneqareersut.
Takuuk: Assit: Nuummi suliffeqarfiit tamaviannguaarput
DHL-stafettimik arpattoqalerpat arpaqataasut 625 takkunnissaat naatsorsuutigineqarpoq. Peqataasut siornamut sanilliullutik amerleriaallassimapput iligiit peqataasut qulinik amerlanerulermata. Peqataasullu amerlanersaannut inissinneq piffissarlu atugaq pingaarnerunngillat suleqatit ikinngutillu nuannersumik ataatsimuualaaqatiginissaat pingaarnersaatinneqarmat.
- Ukiut sisamat ingerlanerinnaanni taama atsigisumik tapersersorneqarneq assorsuaq nuannaarutigaarput, pisortamut allattaaneq Charlotte Mølgaard ataqatigiissaarisuusoq oqarpoq.
Tele-Post Band aamma Nuuk Byorkester arpannerup nalaani nipilersussapput. Sisorartartut peqatigiiffigat NS-84 aaqqissuinermi suleqataaniarpoq pissittaartarfillu pullattagaq meeqqanut atugassanut piareerneqassaaq kiisalu nerisassanik iggisissanillu tuniniaasoqarumaarluni.
Siorna Arpak Shop angutini ajugaasuupput arnanilu Sukka-chok ajugaasuullutik.