Nuuk
DHL stafetsimi ukioq kingullermit annertunerussaaq
DHL stafetsi Nuummi ukiut tamaasa ingerlanneqartartoq alliartuinnavippoq
Arpattut 800-t missaannik amerlassusillit Nuup aqquserngini juunip tallimaani nalunaaqutaq 17.00-imiit 21.00-ip missaata tungaanut arpassapput.
Stafetsimut peqataajumallutik nalunaarnissamut inortuisimasut ulikkaarussaasimasut aaqqissuisunut tassa Tele-Postimut saaffiginnipput. Taamaammat maanna iligiit 35-it allat aaqqissuisunit tikilluaqquneqarput, taamaalilluni DHLStafetsimi katillugit iligiinnik 160-inik peqataasussaqalerpoq.
- Iligiit peqataanissamut nalunaarfissap kingorna nalunaartut taakku inissaqartikkumallugit, aaqqissuussineq allanngortiallattariaqarsimavarput. Qujanartumik tamanna iluatsippoq, stafetimut aaqqissuisuuneq aammalu Tele-Postimi pisortaanermut allatsi Charlotte Mølgaard oqarpoq.
Iligiit nerrivimmik sutorfigisinnaasaminnik inniminniisinnaapput. Tele-Post Band Nuuk Byorkester aaqqissuussinermi nipilersussapput.
Iligiit ataatsit tallimanik inuttaqartassapput, tamarmillu kilometerini tallimani arpattassallutik. Unammisut pingasunngorlugit avinneqassapput, angutinuinnaq, arnanuinnaq akuleriillu.
Sisorartartut NS-84 aamma aaqqissuusseqataapput.