DF: Danmarkip mittarfiliornissanut aningaasartuuteqarnissaa ajunngilaq
Naalagaaffiup mittarfiliornissanut aningaasaliiniarnera Lars Løkke Rasmussenimit suliniutigineqarnera Dansk Folkepartimit taperserneqarpoq
Kalaallit Nunaata aningaasarliunnginnissaa anguniarlugu Naalagaaffiup mittarfiliortitsernissanut aningaasanik tapeeqataanissaa Dansk Folkepartiimit Søren Espersenimit taperserneqarpoq. Taanna Folketingimi Kalaallit Nunaannut tunngasunut ataatsimiititaliami ilaasortaavoq.
Aningaasaliineq pitsaasuuvoq
- Taamaasilluni nunat tatiginanngeriaannaasut aningaasaliinissaat pinngitsoortinneqassaaq, Søren Espersen Sermitsiaq.AG-mut oqarpoq.
- Kim Kielsenip Lars Løkke Rasmussenillu isumaqatigiissuteqarsimanerat ajunngilluinnarpoq. Eqqarsaatigineqartoq pitsaavoq. Kalaallit Nunaata artukkerneqannginnissaa taamaasilluni pissaaq, Søren Espersen oqarpoq. Taassuma naatsorsuutigaa isumaqatigiissut ataasinngorpat atsiorneqassasoq.
Bloktilskudip saniatigut Danmarkip Kalaallit Nunaannut aningaasaliinissaa ajoriffissaqartinngilaa.
- Kalaallit Nunaannut ineriartuutaasinnaasut suliniutit tamarmik tapersersorpakka, Søren Espersen oqarpoq.
Timmisartunut mittarfiit naammassineqarpata qanoq pisoqassanersoq pilersaarusiulereertoqartariaqartoq Søren Espersen oqarpoq.
Pilersaarusiornissaq
- Takornarialerinermut atatillugu aningaasaliisoqangaatsiartoqartariaqarpoq, taamaasilluni mittarfiliornermut aningaasaliissutaasimasut utertikkiartuaarneqarsinnaapput, nassuiaavoq.
Lars Løkke Rasmussenip Kalaallit Nunaaliarnissaa pillugu Kim Kielsenip aningaasaqarnermut akileraartarnermullu ataatsimiititaliaq sisamanngormat nalunaarutigaa.