DF: Paasissutissanik killiliiniarneq ajorluinnarpoq

- Aatsitassarsiornermik tunngasunik paasissutissanik qinnuteqartoqarsinnaanera Kalaallit Nunaanni Naalakkersuisunit killilersorneqalerusuppoq, aamma uranisiornermit. Aatsitassarsiornerup aatsaat aallartinnerani paasissutissanik qinnuteqartoqarsinnaanera aatsaat pisinnaalersinniarneqarpoq, Søren Espersen isummersuutimini allappoq.

- Tamanna Danmarkimi aalassassimaarutigineqarpa? Tv-kkut nutaarsiassani ilanngunneqarpa? Tamanna kikkut oqartussaaqataanerannik innarliinerup danskit naalakkersuisuinit qisuariarfigineqarpa? Naamik, naamik, naamik, Dansk Folkepartip Kalaallit Nunaat pillugu oqaaseqartartua, Namminersornissamullu ataatsimiititaliarsuarmi ilaasortaaqataasimasoq Søren Espersen allappoq.

- Nunani avannarliunerusuni qanoq nunat ingerlanissaannut takorluukkatsinni Kalaallit Nunaata uniorlugu ingerlappaa. Kikkut tamarmik oqartussaaqataanerat Kalaallit Nunaanni matuneqarpoq, tamannalu inuiaqatigiinnut pitsaasuunngilaq, Søren Espersen Sermitsiaq.AG-mut oqarpoq.

- Kalaallit Nunaat equngasumik ingerlavoq, Espersen oqarpoq.

Nutaarsiassaqartitsiviit kingusinaarlutik uunga sammisaqarnerat aamma isornartorsiorpaa.

Tusagassiivik Sermitsiaq.AG-mit KNR-imillu tamanna sivisuumik sammineqareerpoq.

Atassut isornartorsiuisoq
Kikkut tamat oqartussaaqataanerat innarlerneqarsinnaasoq Atassummit ataasinngormat oqariartuutigineqarpoq.

- Tamannarpiaq Atassummiit tusaatissatut tigullugu allagaatinik takunnissinnaatitaanerup aaqqissuussaasumik ammatinneqarnissaa ujartuiffigalugu qisuariaat manna pingaartillugu nalunaarutigaarput, Gerhardt Petersen oqarpoq.

Atassutip siunnersuutigaa allagaatinik takunnissinnaanissamik qinnuteqartut ilaannakortumik tamakkiisumilluunniit periarfissinneqartariaqartoq, taamalu takunnissinnaaneq periarfissaatillugu.

Aatsitassarsiornermut paasissutissanik qinnuteqartoqarsinnaanera ammaffigineqartariaqartoq taamaasilluni Atassummit oqariartuutigineqarpoq.

DF-ip Kiniiserit ernumagaat
Kiniisererpassuit Nunatsinnut suliartornissaat Søren Espersenimit ernumagineqarpoq.

- Suliffeqarfissuit sulisunik akikitsunik sulisoqarusuttarput. Kiniiserit sulisorineqartussaasut taamaasilluni erserpoq. Kalaallit Nunaanni innuttaasut 57.000-it missaanniittuni Kiniiserit 5.500-t suliartorpata Kalaallit Nunaannut allannguerujussuassaaq. Nunanit allaneersut 500.000-it Danmarkimut nunasisuuppata aamma malunnaateqassagaluaqaaq, Søren Espersen oqarpoq.

Maniitsumi atortittarfiit
- Kalaallit Nunaanni allannguerujussuartoqassaaq. Aamma kalaallit nunaqavissut annertuumik suliffissaqartinneqarnavianngillat. Maniitsumi hoteliutillip (Søren Lyberthip) oqaatigereerpaa kiniiserinut atortittarfinnik ammaasinnaasoqassasoq, tamannali kalaallit inuusuttaasa suliffigiumanavianngilaat, ilaa? Søren Espersen aperaaq.

Inatsimmut allannguinissamut siunnersuut akuerineqassappat januaarip aallaqqaataani 2015-mi atuutilissaaq.