DF: Namminiilivinnissaq puigorniarsiuk

Kalaallit Nunaanni aatsitassarsiornermik ingerlatsisoqassagaluarpalluunniit Danmarkimit tapiissutit pinngitsoorneqarsinnaanavianngillat nalunaarusiap takutippaa, taamaammallu Kalaallit Nunaat naalagaaffeqatigiinnermi peqataaginnassaaq.

Dansk Folkepartimit Kalaallit Nunaannut tunngasunut oqaaseqartartoq Søren Espersen oqarpoq.

- Nalunaarusiap takutippaa naalagaaffeqatigiinneq pingaarnerusoq. Kalaallit namminiilivinnissamut eqqarsaataat piviusorsiornerunngitsoq nalunaarusiap takutippaa, Søren Espersen oqarpoq.

Naalakkersuisut Siulittaatuata Aleqa Hammondip arlaleriarluni taasareerpaa Kalaallit Nunaat namminiilivikkiartuaarnermut ingerlasoq.

Danmarkip ukiumoortumik tapiissutigisartagaat 3,6 milliard koruunit tikinneqassappata nalunaarusiorneranni paasinarsivoq Kalaallit Nunaat aatsitassarsiorfinnik angisuunik 24-nik atorfissaqartitsissasoq.

Aatsitassarsiorfinnik marlunnik maannakkut ammaasoqarnissaa pilersaarutigineqarpoq, ammarnissaanulli suli aningaasaliisoqanngilaq.

Kalaallit Nunaat nammineerluni aatsitassarsiornermi aningaasat iluanaarutigineqartut kalaallinut kisimi tuttassappata Søren Esperseni isumaqanngilaq Danmarki Kalaallit Nunaannut tapiisarnera ingerlaannassasoq.

- Kalaallit Nunaat uagutsinnut ima oqartarpoq: 'Katinnikuuvugut, aningaasaatilissuanngoruttali avikkumaarpugut'. Tamanna akuerineqarsinnaanngilaq. Assigiinnarpaa uagut ukiuni 25-ni tulliuttuni lotto-mik eqquiniartut aningaasalersussagigut, DF-imi oqaaseqartartoq oqarpoq.

- Sammisaq pillugu Folketingimi tusarniaasoqarnissaa kissaatigaara Folketingimi ilaasortanit Inatsisartunilu ilaasortanit peqataaffigineqartumit. Tassani paasinarsissaaq naalagaaffeqatigiinnerput qanoq iliuuseqarfigineqassanersoq.

- Imaattoqaannarsinnaanngilarmi kalaallit naalakkersuisunut siulittaasuat periarfissinneqarnerit tamaasa Danmark pillugu oqalupiluttassasoq, Søren Espersen oqarpoq.