Skip to main content

DF-eq Hans E-ip siunnersuutaanut: Siunnersuut ajorluinnartoq

- Siunnersuut ajorluinnartoq. Imminut aqussinnaaneq ilinniartariaqarpaa, DF-ip Folketingimi Nunarput pillugu ataatsimiisitaliami ilaasortaatitaa Martin Henriksen Hans Enoksenip Namminersorlutik Oqartussat suliffeqarfiutaanni siulersuisuni ilaasortanik nungusaaniarluni siunnersuuteqarneranut oqarpoq.

Partii Naleqqap siulittaasuata, Hans Enoksenip, tallimanngornermi nalunaarutigaa Namminersorlutik Oqartussat suliffeqarfiutaanni siulersuisuni ilaasortanik nungusaaniarluni piumasaqarluni, isumaqarami suliffeqarfinni Namminersorlutik Oqartussat pigisaanni kalaallit nunaqavissut kisimik ilaasortaasariaqartut.

Sermitsiaq.AG-ip tallimanngornermi allaaserisaatut Hans Enoksenip suliniutini iluatsissaguniuk, qinersinerminilu taperserneqassaguni - nungusaanermik annerusumik kinguneqassaaq - maanna siulersuisuni siulittaasut arfineq-marluk aamma ilaasortat 23-it peerneqassammata.

Aamma atuaruk: Enoksen: Siulersuisunut ilaasortat 30-t nungusarneqassapput

Martin Henriksen: Kalaallit Nunaannut ajoqusiissaaq

DF-ip Folketingimi Nunarput pillugu ataatsimiisitaliami ilaasortaatitaata, Martin Henriksenip, eqqarsarluaqqaartoqarnissaa piumasaraa.

Taama Ekstra Bladet allappoq.

- Siunnersuut ajorluinnartoq. Imminut aqussinnaanini ilinniartariaqarpaa, Martin Henriksen Ekstra Bladet-imut oqarpoq.

Hans Enoksenip isumaa malillugu kalaallit nunatsinni nunaqavissut suliffeqarfissuit siulersuisuini kisimik ilaasortaasassapput. Hans Enoksenip isumaa naapertorlugu nunaqavissoq kalaaliuvoq, kisianni aamma qallunaanik nunaqqateqartugut ukiorpassuarni nunaqqatigisimasatsinnik.

- Siunnersuut ajorluinnartuuvoq Kalaallit Nunaanni inuussutissarsiornermut sequmiisinnaasoq. Takorluulaaruk Danmarkimi Folketingimi qallunaat pisortaanertut aamma qallunaat suliffeqarfiutaanni siulersuisuni ilaasortatut kisiisa akuerineqaraluarpata. Kikkut tamarmik illaatigissangaluarpaatigut, aamma pissutissaqarluarlutik, Martin Henriksen oqarpoq, nangillunilu:

- Hans Enoksenip taama oqaaseqarnermigut Kalaallit Nunaat ajoquserpaa, taamaammat imminut aqussinnaanini ilinniartariaqarpaa. Qallunaat Kalaallit Nunaanni nungusarneqassanngillat aamma taamatut kalaallit Danmarkimi nungusarneqassanngillat. Kalaallillu politikerii taama oqaaseqaraangamik tamatigut pissutaasarpoq Kalaallit Nunaanni ajornartorsiutit qanoq aaqqiiviginiarnerlugit eqqartorusunnginnamikkit.

Kaammattuut: Oqaaseqaat utertinneqarli

Martin Henriksen Ekstra Bladet-imut nassuerutigaa, Kalaallit Nunaanni pissutsinut akuleruttutut pasillerneqarumaarnini ilimagigini. Tamannali uniffiginianngilaa:

- Hans Enoksen partiialu sakkortuumik kaammattussavakka oqaaseqaammut uterteqqillugit. Oqaaseqarnerummi Kalaallit Nunaat ajoqusermagu. Avataanimmi aningaasaliisartut nunamut Hans Enoksenip iluarisaannaanik pisortaaneqarlunilu siulersuisoqartunut aningaasaliinavianngillat. Neriuppungalu Kalaallit Nunaanni partiit allat aamma oqaaseqaammut akerliliiumaartut.

- Kalaallit politikerii aalajangersinnaassuseqarnerujumallutik kissaateqarunik, taava Naalagaaffeqatigiinnerup iluani periarfissat atorlugit iliuuseqartariaqarput, qallunaanut sorsunnissamik nalunaaratik. Tamannami qallunaarpassuarnut Kalaallit Nunaanni najugaqartunut aamma sulisunut naapertuutinngilaq. Tamannali sianiilliorneruvoq, Martin Henriksen isummersorpoq.

Dansk Folkeparti –  allat arlallit assigalugit – Kalaallit Nunaata aamma Danmarkip naalagaaffeqatigiiginnarnissaanut kissaateqartuupput.

Aamma atuaruk: Tillie Martinussen: Hans, tassa

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER