Demokraatit: Pisortat ataasiakkaanik aqutsinerat taamaatikkusupparput
Ukiuni 40-ni partiimit socialistiusumit naalakkersuinermik ingerlatsisoqarnerata, inuit ataasiakkaat pisortanit aqunneqarnissaannik naatsorsuuteqarnermik pilersitsisoqarpoq. Demokraatit taama isumaqarput, politikki taamaattoq taamaatinnissaa oqaatigaat.
Demokraatit pingasunngornermi tusagassiortunik katersortitsinerminni partiip anguniagai saqqummiuppaat, tassanilu inuit ataasiakkaat pisortanit aqunniarneqarnerat taamaatinniarlugu oqaatigaat. Maanna Inatsisartunut ilaasortaasut pingasut, Nivi Olsen, Justus Hansen aamma partiimi siulittaasoq Randi Vestergaard Evaldsen, tusagassiortunik katersortitsipput.
Nammineq aalajangiisinnaaneq
- Nammineq inuunermut aalajangiisinnaatitaanerup inuiaqatigiinnut uterteqqinneqarnissaata ineriartortinneqarneranut iliuuseqarnermut siuttuuniarpugut, pisortat nukissatik tamaasa innuttaasunut inuussutissarsiortunullu tamakkiisumik sinaakkusersuinermut atuissallutik, taamaalilluni nammineq aalajangiisinnaanermut kiffaanngissuseq sapinngisamik annertunerpaanngortinneqarluni, partiip siulittaasua Randi Vestergaard Evaldsen oqarpoq.
Qinigassanngortittut allattorsimaffiat 21-nik inuttaqartoq saqqummiunneqarpoq, kisianni sassartut amerlanerussasut partiip siulittaasuata oqaatigaa. Innuttaasut apriilianni qinersilerpata, partii ikinnerpaamik 30-nik qinigassanngortitaqarniarpoq.
Suli tupaallannartoqarumaartoq
- Piffissami aggersumi qinigassanngortunik tupaallannartunik saqqummiussaqassaagut, taakkulu qilanaaraagut, Randi Vestergaard Evaldsen ilisimatitsivoq, taamaalilluni taassuma qinigassanngortittut ataasiakkaat tamakkiisumik malunnartinniarnissaat kissaatigaa.
’’Tupaallaatissat’’ inuussutissarsiornermik suliaqartup Niels Thomsenip Ilulissaneersup saqqummiunneqarneratut ikkumaartut, partiimi siulittaasup oqaatigaa.
- Allatut periuseqarniarluta toqqarparput, qinigassanngortittut taamaalillutik sooq nammineq qinigassanngortinnertik oqaluttuarisinnaaniassammassuk, Randi Vestergaard Evaldsen nassuiaavoq.
Partiip uani qineqqusaarnermi aningaasat kingullermi qinersinermut sanilliullugu amerlanerusut atorniarpai. Partiimili siulittaasup aningaasat qanoq amerlatiginersut oqaatiginianngilaa.
- Assersuutigalugu weekendimi qinigassanngortitatsinnut ataatsimoortitsiniarpugut, tassani qineqqusaarneq pilersaarusiussavarput, partiimi siulittaasoq paasissutissiivoq.
Meeqqat atuarfiat nukittorsarneqassaaq
Qineqqusaarnermi sammisassani meeqqat atuarfiata ilinniartitaanerullu sinnerata nukittorsarneqarnissaa partiimut pingaarnersaavoq. Aammattaaq peqqinnerup, minnerunngitsumillu inuussutissarsiornerup atugassarititai ilungersuunneqassallutik.
- Suliffeqarfiit pillugit allaffissorpallaarnersuaq peertissavarput, aallarnisaanerlu nukittorsaaffigalugu, Justus Hansen naqissusiivoq.
Demokraatit qinigassanngortitaat partiip nittartagaani takukkit