internet akikinnerusoq

Demokraatit Telep kisermaassinera atorunnaarsikkusuppaa

Suliffeqarfiup Namminersorlutik Oqartussanit pigineqartup, imaatigut kabelikkut internetsimut attaveqartitsinermut ingerlatsilluni kisermaassiunnaarnissaa partiip kissaatigaa

Randi Vestergaard Evaldsen, Demokraterne
Demokraatineersoq Randi Vestergaard Evaldsen, attaveqaateqarnerup unammilleqatigiiffiulipallannissaa kissaatigaa

Ukiuni makkunani Nunatta nalunaarasuartaaserneq tamaat unammilleqatigiiffiulersikkiartorpaa. Internetsimik aaqqiissutinik aammalu mobilinik oqarasuaatinillu tuniniaanerit tassani ilanngullugit pineqarput.

Kisianni tamanna naammanngitsoq, Demokraatit naalakkersuisooqataasut isumaqarput.

Immap naqqatigut kabeli unammilleqatigiissutaali
Attaveqaqatigiinnermut ingerlatsineq, immap naqqani kabeli Greenland Connect internetsimut attavilik, radiut atassuteqatigiiaat aamma qaqqani oqarasuaatit kabelii, Tele-Postip ullumikkut kisermaassilluni ingerlatai aamma unammilleqatigiissutigineqassapput.

Akikinnerusoq
- Nalunaarasuartaaserinerup unammillerfiulernissaanut pilersaarutit piviusunngortinneqassappata ilimagineqarpoq attaveqaatinut angallakkanut angerlarsimaffimmilu oqarasuaatinut kiffartuussineq akilinnerulissasoq pitsaanerulerlunilu, kiisalu neqeroorutit pitsaanerulernissaat ilimagineqarsinnaalluni. Soorlu nunarsuup sinnera takuneqareersutut. Taamaammat aamma ilimangaarput attaveqatigiinnerup ingerlannera unammillerfiulerpat pitsaanerusumik akikinnerusumillu ingerlanneqarsinnaalissasoq, Randi Vestergaard Evaldsen isumaqarpoq.

Aggulullugu
Taassuma tikkuartorpaa, Tele-Postip attaveqarniarneq akikinnerusumik pitsaanerusumillu ingerlassinnaanngippagu, ingerlatsineq suliarinnittussarsiunneqarsinnaasoq, imaluunniit Tele-Post aggulunneqarsinnaasoq ingerlatsivimmut pisortat pigisaannut aamma ingerlatseqatigiiffimmut unammilleqatigiiffiusumut.

Tassunga atatillugu tikkuarpaa, ingerlatsinermi aningaasartuutit taamaaliornikkut ersarissarneqassasut qularnaarneqassasoq, taamatullu sapinngisamik pitsaanerpaamik ingerlanneqalernissaa.

Attartortillugu
Ingerlatseqatigiiffiup tunuatungaaniittup teknikkikkut nalunaarasuartaaserinermi attaveqarneq ingerlatissagaa, attaveqarnermilu atortut ingerlatseqatigiiffiup niuernerpalaartumik ingerlatsiniartumut Tele-Postimut atukkiutissagaat allat nalunaarasuartaaserinerikkut ingerlatseqatigiiffiit pisisartunut kiffartuutassanullu nalitut unammilleqatigalugit, partii taama isumaqarpoq.

Powered by Labrador CMS