qinersineq
Demokraatit siulittaasuat: Meerallunga naalanngissimaqaanga
Demokraatit siulittaasuata Andreas 'Anda' Uldumip qatanngutini angutit marluk peroriartoqatigai, namminerlu oqarneratut, naalanngitsuusimapput. Oqarporli qatanngumminit immikkooruteqarsimalluni sulilu immikkooruteqarluni
Anda Uldum angut ulapittuaannartuuvoq. Tamannalumi ersarippoq Namminersorlutik Oqartussat illorsuanni allaffiani Sermitsiap aallartitaata naapimmagu.
- Angutinik marlunnik qatannguteqarpunga, Simon Ib-ilu, immaqalu amerlasuut naatsorsuutigisinnaasaattut ilaannikkut pilikalaartaqaagut. Naalanngissimaqaagut, Anda Uldum nuannersumik illarluni oqarpoq.
Demokraatilli siulittaasuat isumaqarpoq nammineq, ajunngitsutigut ajortutigullu,
taamanikkut maannalu qatanngumminit assigiinngissuteqarluni.
- Isumaqarpunga qatanngutinnit ammasuunerullunga kikkullu tamaasa saaffigisinnaavakka. Ajoqutaasimavorli tamatigut unneqqarilluinnartarsimagama, immaqalu pisut ilaanni unneqqarippallaartarlunga, Anda Uldum illalaarluni oqarpoq.
Politikeri qungutsorissup meeraanini tamaat suut tamaasa nammineq isumaqarfigisarsimavai, inerniliinissaminullu suut tamarmik isumaqatigiinniutigineqaqqaartussaasarsimapput.
Allaaserineqartoq Sermitsiami atuarneqarsinnaavoq. Aviisi uani pisiarisinnaavat: