partiimut tapiissutit

Demokraatit: Siulittaasoqarfik partiinut tapiissutit pillugit salloqittaavoq

Partiinut tapiissutit 30 procentimik qaffanneqarnissaannik kissaateqarneq, sisamanngornermi siullermeerneqartoq, Inatsisartut Siulittaasoqarfiannit paasissutissanik salloqittaataasunik tunngaveqarpoq.

Demokraatit siulittaasuat Randi Vestergaard Evaldsen taama oqarpoq.

Paasissutissat kukkusut
Partiinut qinikkanullu tapiissutit qaffanneqarnissaannut Lars-Emil Johansenip tunngavilersuummini oqarpoq, tamanna tapiissutit 2006-imili aaqqinnikkuunnginnerannik pissuteqartoq.

- Tamanna ilumuunngilaq. Partiinut tapiissutit 2009-mi aammalu 2010-mi naleqqussarnikuusimapput, Randi Vestergaard Evaldsen naqissusiivoq, taanna inatsisissatut siunnersuutip siullermeerneqarnerata kingorna siulittaasoqarfiup inatsisissatut siunnersuummut nassuiaatai misissoqqinnissaanut piffissaqarsimavoq.

2009-mi qinikkanut tapiissut 125.000 koruuniniit 170.000-inut naleqqussarsimapput tunngaviusumillu tapiissut 300.000-iniit 650.000 koruuninut naleqqussarsimallutik. 2010-mi qinikkanut tapiissut 170.000-iniit 210.000-nut naleqqussarsimapput, Demokraatit siulittaasuat taama ilisimatitsivoq.

Uukapaatitsineq
- Isumaqarpunga uukapaatitsiniarnerusoq siulittaasoqarfik taamatut nassuiaatitalimmik allannera. Isertuussassaanngilaq partiit tapiissutaat 2009-mi aammalu 2010-mi toqqaannartumik qaffanneqartut. Sooruna tamakkua ersarissumik nassuiaanneqanngitsut? Tassa tamakkua uanga isinni Inatsisartut tatiginassusaannut innarliilluinnartartut, tamannalu ajuusaarnartorujussuuvoq, taanna oqarpoq, nangillunilu:

- Imminnut partiimulluunniit iluaqusiisussamik takullutillu sukkaannaq akuersisaraat, partiimi siulittaasoq partiinut naalakkersuisoqatigiinnut unnersuussilluni oqarpoq, taakku sisamanngormat annertuumik qaffaanissamut tapersiipput.

2 millionit sinnerlugit akeqartoq
Inatsisip allanngortinneqarnera nunap karsianut saniatigut ukiumut 2.185.000 koruuninik akeqassaaq, taakkulu 2018-imi aningaasanut inatsisissamut siunnersuummi ilanngunneqanngillat, tassa imaappoq, taama amerlatigisunik aningaasanut inatsisissamit sipaarniutinik ujaasisoqassaaq.

Partiinut tapiissut qinersinermi taasinerit naapertorlugit agguaattalerneqarnissaa Demokraatit kissaatigigaluarpaat. Tamatuma partiit minnerit isertitaqanngitsut politikkikkut sulinermut aningaasatigut ikiorserneqarnissaat qulakkiissammagu.

Powered by Labrador CMS