tulleriissaarineq

Demokraatit: Politikkikkut anguniakkavut ukuupput

Danmarkimit aningaasanik pisartagaqarunnaarnissaq Demokraatinit sulissutigineqassaaq. Namminersorlutik inuussutissarsiortut siunissami aallunneqarnerussasut partii isumaqarpoq

Demokraatit siulittaasuat Anda Uldum

Suliffeqarfinnik amerlanerusunik pilersitsisariaqarpugut. Takornarialerineq annertunerusumik aallunneqassaaq. Pissutsit pitsaanerulertariaqarput inuussutissarsiutileqatigiiffiillu namminersortut aallunneqarnerusariaqarput.

Demokraatit siulittaasuat Anda Uldum oqarpoq.

Nuna tamakkerlugu Demokraatit Nuummi ataatsimeersuarput akunnerup naanerani. Danmarkimi naalakkersuinikkut ingerlatseqataasut, Radikale Venstre, Demokraatit aamma suleqatigisaat, ataatsimeersuarnermi najuupput.

- Kalaallit Nunaata Danmarkimit aningaasanik tapertittarnerminit aniguinissaanut sulisoqartariaqarpoq, Demokraatit ataatsimeereersut Anda Uldum Sermitsiaq.AGmut oqarpoq.

Kalaallit Nunaanni aningaasaqarneq siuariartussappat namminersorlutik inuussutissarsiuteqartut pitsaanerusumik atugassaqartinneqartalertariaqartut siuliulittaasup oqaatigaa.

- Amerlanerusunik suliffissaqartitsinerulissaaq, akileraarutitigut isertinneqartut amerlanerulissapput kiisalu isumaginninnermut aningaasartuutigineqartartut ikinnerulissallutik, Anda Uldum oqarpoq.

Takorluukkat piviusullu
Naalakkersuisut takorluukkanik eqqarsaateqarpallaaqaat. Aatsitassarsiornermi aningaasarsiornermi isertinneqarsinnaasunik eqqarsaateqarput. Kisianni qulakkiivillugu suli paasinikuunngilarput ilumut Nunarput aningaasanik isertitaqarumaartoq, Uldum naqissusiivoq.

- Soorunami aatsitassarsiorneq sammineqassaaq, inuussutissarsiutillit allat annertunerusumik sammineqartariaqarput. Inatsisartuni kommunalbestylsinilu annertunerusumik tamanna pillugu suliniuteqartariaqarpoq, Anda Uldum oqarpoq.

Sulinermut ilanngaateqartitsisoqartalernissaa eqqunniarneqarpoq.

- Sulineq akilersinnaasariaqarpoq akissarsiaqqortunerit annertunerusumik akileraartalernissaat isumaqatiginngilarput kiisalu isertitarineqartunut akileraaruseeqqikkusunngilagut. Suliffeqarfinnut akileraarut annikillineqassasoq isumaqarpugut taamaasilluni inuussutissarsiutinut suliaqartunik pitsaanerusumik atugassaqarnissaat anguneqassammat, Anda Uldum oqarpoq.

Demokraatit nuna tamakkerlugu ataatsimeersuarnerani illoqarfinnit tamanit peqataasoqarpoq. Ataatsimeersuarnermi inuit 20-t peqataapput.

Powered by Labrador CMS