Demokraatit: Nipangeqqusaanngisaannassaagut

Demokraatit isummatik annittarpaat, oqaatigerusutatik oqaatigisarpaat allaniillu aqunneqarneq ajorput. Siumumit aamma partii aqunneqarsinnaanngilaq.

Sermitsiaq.AG-mit apersorneqarnermi Demokraatit naqissusiipput.

Inuit Ataqatigiit inuusuttunut immikkoortortaqarfiata Inuusuttut Ataqatigiinnit Naalakkersuisooqataasunut sisamanngormat isornartorsiuipput. Partiimi Siumumi pisut Atassummit Demokraatiniillu qisuariaatigineqanngippallaartut ilaatigut isornartorsiuisoqarpoq.

- Inuit Ataqatigiinnit aamma Inuusuttut Ataqatigiinnit Inatsisartunut qinersinissamut qineqqusaarnermi eqqaamasariaqarpaat partiit tamarmik neriorsuutigimmassuk toqqissisimasumik tatiginartumillu sulisoqassasoq. Demokraatit akisussaaffimmik tigusisinnaapput. Naalakkersuisooqatigiinnissamik isumaqatigiissummi 2009-mit 2013-imut atuuttumi tamanna takutinneqarpoq. Naalakkersuisooqatigiinnissamut isumaqatigiissummi matumani assinganik suleriuseqarnissarput sulissutigaarput. IA suleqatiginagu Siumut maannakkut suleqatigaarput. Demokraatit partiit tamarmik suleqataarusuttut suleqatigisinnaavai, Demokraatini politikkikkut siulittaasup tullia Randi Vestergaard Evaldsen oqarpoq.

Demokraatit: Siumuunngilagut
- Siumumik suleqateqarneq pissutaalluni Demokraatit Siumunngortuusut oqaatigineqarsinnaanngilaq. Partiit assigiinngissuteqarpugut, assigiinngitsunik naleqartitaqarpugut kiisalu assigiinngitsunik isummersortarluta. Isumaqatiginninniarnermi isumaqatigiittoqarsinnaasariaqarpoq. Qineqqusaarnermi tamanna neriorsuutigineqarpoq, 2009-mit 2013-mut aamma taamatut pisoqarpoq.

- Atassutip Demokraatillu Naalakkersuisooqataalernermi kingorna nipaarussimasut Inuusuttut Ataqatigiinnit paasiuminaatsinneqarpoq. Tamanna Demokraatinit qanoq oqaaseqarfigineqarsinnaava?

- Taamatut pasilliinnginnermi Inuusuttut Ataqatigiit aamma Sermitsiaq.AG taamatut oqartoqartinnagu misissueqqaarnissaat oqaatigissallugu tulluartuuvoq. Demokraatit nipaanngillat. Isummagut annittarpagut aamma tamanna ingerlatiinnassavarput.

- Pituffimmi kiffartuussinissamut isumaqatigiissutip annaaneqarnera Demokraatinit sooruna oqaaseqarfigineqarpallaarsimanngitsoq, sooruna Naalakkersuisut siulittaasuata Naalakkersuisoqarfiani pisortaasup Svend Hardenbergip tunuartitaagallarnera pillugu oqaaseqartoqarpallaarsimanngitsoq, aamma Inuusuttut Ataqatigiinnit isumaqarput peqqinnissaqarfimmut naalakkersuisoqarfik tulleriissaarnermi kingulliutinneqartoq Doris Jakobsenip Folketingimi ilaasortaaleqqinnera pissutaalluni, aamma sooruna Nick Nielsenip Folketingemi ilaasortaajunnaarsinneqarnera pillugu suliami oqaaseqartoqarpallaarsimanngila?

- Nipangeqqaannanngilagut, Demokraatini politikkikkut siulittaasup tullia Randi Vestergaard Evaldsen oqarpoq. Pituffimmi kiffartuussinissamut isumaqatigiissutip annaaneqarnera misissorneqarluarneqartariaqartoq Demokraatinik piumasarineqarsimaneranut oqaaseqaat innersuullugu.

'- Uani arlaannaannulluunniit tikkuaasinnaanngilanga, kisianni neriuutigaara ersarissumik pisoq pillugu nalunaarusiortoqarumaartoq, Randi Evaldsen Vestergaard Sermitsiaq.AG-mut februaarip 20-ani oqarpoq (Allaaserineqartoq atuaruk: Partii Naleraq Demokraatillu: Periarfissarsiortariaqalerpugut)

- Suliaq Naalakkersuisooqatigiinni matumanut attuumassuteqanngilaq, tamanna eqqaamaneqartariaqarpoq. Naalakkersuisooqatigiinnut siuliinut tunngasuuvoq. Folketingimut tunngatillugu oqallinnermi Demokraatit iliuuseqarpallaarsinnaanngillat ministerimulluunnit apeqquteqarsinnaanata. Folketingimi ilaasortaasut - IA-mit Johan Lund Olsen aamma Siumumit Doris Jakobsen - folketingimi ilaasortaatitaqartuupput, Randi Vestergaard Evaldsen oqarpoq.

D: Hardenbergip atorfinitsinneqarnera kammalaatersorneruvoq
- Svend Hardenbergimut tunngatillugu suliami aamma nipangeqqaannanngilagut, Randi Vestergaard Evaldsen oqarpoq. Tassani Demokraatini siulittaasup Anda Uldumip oqaasiinut innersuussivoq. Taanna AG-mi sapaatip akunnerani matumani saqqummersumi pisoq pillugu ilaatigut ima oqaaseqarpoq: 'Svend Hardenbergip atorfinitsinneqarnera isornartuuvoq' aamma 'Atorfinitsinneqarneranut Demokraatit oqarput Siumut kammalaatersorluni Svend Hardenberg atorfinitsikkaa'.

Randi Vestergaard Evaldsen Sermitsiaq.AG-mit februaarip 19-ani apersorneqarami ima oqarpoq:

'Kim Kielsenilu isumaqatigiissuteqarnikkut nassiunneqartoq oqaatigereerpara. Svend Hardenbergip Kim Kielsenimik isumaqatigiissuteqarsimanera Nick Nielsenimut mailimi nassiussami ersarinnerusimasinnaagaluarpoq. Atorfilittat qinikkanut kukkusoqarneranik piumasaqaateqarsinnaannginneranik IA-mit oqariartuutigineqartoq paasisinnaavara. Kisianni aamma qinikkat kukkussuteqarsimagaangata uparuarneqartarnissaat isumaqarpunga'

- Doris Jakobsenip Siumup qullersaqarfiata aalajangigaanik Folketingimi ilaasortaaleqqinnera Demokraatinit qanoq oqaaseqarfgineqarsinnaava?

- Nick Nielsen taarserlugu Doris Jakobsenip Folketingimi ilaasortaaleqqinnera partiip Siumup akisussaaffigaa, tamanna uagut ilannguffiginavianngilarput. Partiit allat ajornartorsiutaannut soorlu aamma ilanngunneq ajortugut.

- Peqqinnissaqarfiup tulleriissaarnermi kingulliutinneqarnera Inuusuttut Ataqatigiinnit Inuit Ataqatigiinniillu oqaatigineqartoq oqaasiinnaavoq ilumuunngitsoq. Siumumit Matha Lund Olsenip suliassaq ingerlassinnaagaa tatigaarput, taamaattumik peqqinnissaqarfiup tulleriissaarnermi kingulliutinneqarneranik oqaluttoqarnera uagut tungitsinnit oqaatigiinnarsinnaavarput.

Nipangeqqusaasimanngitsut
- 'Suleqatigiinnermi pingaartillugu isumaqatigiissutaavoq nunarput inuilu pillugit pitsaasumik, tatiginartumik, tutsuiginartumik innuttaasullu qitiutillugit Inatsisartuni Naalakkersuisunilu sulinissaq', Demokraatit tamanna qanoq oqaaseqarfigisinnaavaat?

- Innuttaasut uunga apeqqummut qanorluunniit isummersorsinnaatitaapput. Tamanna Demokraatinit killilersorneqarsinnaanngilat. Oqaatigiinnarsinnaavara Demokraatinit sapinngisarput tamaat sulivugut. Innuttaasut isumaat tusaasarpavut, tusagassiuutit apeqqutaat akisarpagut aamma Inatsisartuni upernaanerani ataatsimiinnissami siunnersuuteqarpugut. Tamanna innuttaasut naammagineraat uagut aalajangersinnaanngilarput, Demokraatini politikkikkut siulittaasup tullia Randi Vestergaard Evaldsen oqarpoq.

- Naalakkersuisooqataalernissinnit Siumumit nipangeqqusaasimanissinnik Inuusuttut Ataqatigiinnit apeqqutigineqartoq qanoq oqaaseqarfigisinnaaviuk?

- Naamik, piumaffigineqarnikuunngilagut, aamma nipangeqqusaanissatsinnik piumaffigineqanngisaannassaagut.