innuttaasunik taasisitsiumanngilaq
Demokraatit naqissusiipput: Urani pillugu innuttaasunik taasisitsisoqassanngilaq
Partiip naalakkersuisooqataatitsisoq isumaqarpoq urani pillugu innuttaasunik taasisitsinikkut Kalaallit Nunaata nunani tamalaani uppernassusia innarlerneqaannassasoq
Uuliamik qalluissanersugut, aatsitassanik qaqutigoortunik piiaassanersugut imaluunniit uranimik stoffinillu allanik radiop qinngornerinik ulorianartunik akulinnik piiaassanersugut innuttaasunik taasisitsisoqassanngilaq. Taamatut oqarpoq Inatsisartunut ilaasortaq Justus Hansen (D).
Taanna allappoq inuit naatsorsuutigisinnaassagaat politikerit aalajangigaat atuuttuussasut ullormiillu ullormut allanngortinneqartassanngitsut.
Tunngavissat eqqunngitsut
– Assersuusiulaarlangs: Uuliasioqatigiiffik ujaasinissamut akuersissummik tunineqarpoq millionerpassuillu atorlugit uuliamik ujarlerpoq, taava aalajangiineq tassanngaannaq allanngortissinnaanngilarput akuersissullu utertillugu.
– Tamatumammi kingunerissavaa uuliasioqatigiiffik eqqunngitsumik tunngaveqarluni aningaasaliissuteqarsimasoq, tamatumalu kingunerissavaa selskabit allat - aamma sammisaqarfinnut allanut - nunatsinni aningaasaliissuteqarnissaminnut eqqarsarnartoqartitsilernerat, Justus Hansen erseqqissaavoq.
Uppernassuseq innarlerneqassaaq
Taanna oqarpoq tamatumani aamma urani pineqartoq.
– Inatsisartuni amerlanerussuteqartut uranimut akuersaanngilluinnarneq atorunnaarsinnikuuvaat, aalajangernerlu tamanna tunngavigalugu ujaasinermut millionerpassuit atorneqarsimapput. Taamaattumik innuttaasunik taasisitseriataassagaluarutta aalajangernerlu tamanna allanngortillugu, qularnanngilluinnarpoq nunani tamalaani uppernassuserput innarlerneqassasoq, Demokraatineersoq Justus Hansen oqarpoq.