Inatsit tunngaviusoq

Demokraatit: Namminersulernissaq siunissami ungasinnerusumiippoq

Naalakkersuisooqatigiit namminersulernissamut sukannersumik suliaqalernerat Demokraatinit isumaqatigineqanngilaq. Inatsimmullu tunngaviusumut ataatsimiititaliortoqarnissaanik suliarinnipallanneq isornartorsiorlugu

Demokraatit naalakkersuisoqatigiit namminersulivinnissaq pillugu sakkortusaarnerulersimasut maluginiarpaat. Tunngaviusumik inatsisiliortussamik siunnersuisoqatigiiliortoqarnissaa Inatsisartuni piaarnerpaamik suliaritinniarneqartoq ilaatigut taakkortorlugu.

Inatsisinut ataatsimiititaliap sukkaannaq suliarinnittoqarnera isumaliutissiissummini aamma isornartorsiorpaa.

Atuaruk: Tunngaviusumik inatsisissamik tuaviuussineq ataatsimiititaliap isornartorsioraa

Namminersorluno Oqartussat siulliunneqarlik

- Demokraatini periuserineqartunut isumaqataanngilagut. Namminersorluni Oqartussaaneq iluatseqqaartariaqaripput namminersulivinnissamut alloriartigata isumaqarpugut, Demokraatit siulittaasuat Randi Vestergaard Evaldsen tusagassiutinut nalunaarummi allappoq.

Politikkikkut namminersulivittoqassappat atugarissaarneq ingerlatiinnarneqassappat milliarderpassuit suli amigaatigineqartut taakkartorpaa.

Atuaruk: Inatsisartut immikkut ittumik ataatsimiissapput

Aningaasaqarneq patajaatsoq

Kalaallit aningaasarsiornerisa patajaallinissaat namminersulivinnissamik napatitsisinnaanngorlugu Demokraatit anguniagarigaat aamma oqaatigaa.

- Tunngaviusumik inatsisiliortussanik siunnersuisoqatigiinnik pilersitsisoqarmat nammiinersulivittoqarumaartoq upperinngilarput. Suaarutiginninnermilluunniit 'uteriaqqissinnaajunnaarluta namminersulivinnissamut allartugut' naalakkersuisoqatigiit oqarnerattut, Randi Vestergaard Evaldsen oqarpoq.

Atuaruk: - Ulloq pingaarutilik

Siunissami ungasissumiippoq

Namminersulivinnissaq anguneqassappat tamatta ilungersulerutta ilinniarsimassuseq qaffassarniarlugu suliniartariaqartugut aningaasarsiornerput pitsanngorsarniarlugu Demokraatit siulittaasuat isumaqarpoq.

- Namminersulivinnissarput siunissami ungasissorujussuarmiittoq imaaliallannerinnakkullu anguneqarsinnaanngitsoq nalilerparput. Namminersulivinnissattali angunissaa ilungersuutigisussaavarput.

Naalagaaffeqatigiinnerput sutigut tamatigut iluaqutissarsiviginiartariaqaripput tamanna tikissiillugu Demokraatit isumaqarput.

Atuaruk: Kim Kielsen tulluusimaartoq: Namminersulernissamut ingerlariarneq pingaarutilik

Naalagaaffiit kattunnerat

- Danmarkimut Savalimmiunullu attaveqassutigut amerlanerupput avissaarutissaninngaanniit. Tamanna puigussanngilarput.

- Taamatullu oqareerluta isertuutissanngilarput qilanaarigatsigu ulloq taanna Naalagaaffeqatigiinnerup Naalagaaffiit ataatsimoortunik taarserneqarnissaat, Randi Vestergaard Evaldsen (D) naggasiivoq.

Atuaruk: Tunngaviusumik inatsisiliornissamut ataatsimiititaliaq Inatsisartunit suliaripallanneqartoq

Powered by Labrador CMS