najukkami immikkoortortaqarfik
Demokraatit Kommune Qeqertalimmi immikkoortortaqarfittaarput
Simigaq Heilmann Demokraatit Kommune Qeqertalimmi immikkoortortaqarfiani siulittaasunngorpoq
- ”Kommune Qeqertalik nutaajuvoq taamaammallu suliassaqaqaluni. Demokraatit Qeqertalik oqallinnermi peqataalluarniarpoq taamatullu aaqqiissutissanut pitsaasunik eqaatsunillu siunnersuuteqartarniarluni. Immikkut ukkatariniarparput inuutissarsiutinik ineriartortitsineq sualummik sulliviit namminersortut immikkut ineriartortinneqarsinnaapput.
Demokraatit Kommune Qeqertalimmi immikkoortortaqarfiani siulittaasunngortoq, tusagassiuutinut nalunaarummi oqarpoq.
Siulersuisunngortut aamma tulliani Inatsisartunut qinersinissaq akuuffiginiarpaat, tassani eqqarsaatigineqarluni najukkami arlalinnik nukittuunik sassartitsinissaq.
- Nalunngilarput ukiup ataatsip ingerlanerani Inatsisartunut qinersisussaalluta taamaattumik maannagaaq eqqarsaatigilereertariaqarparput neriulluta Demokraatit Qeqertalik arlalinnik Inatsisartunut qinigaatitaqarumaartoq, Simigaq Heilmann erseqqissaavoq.
Siulersuisuni ilaasortat:
Siulittaasoq: Simigaq Heilmann, Qeqertarsuaq
Siulittaasup tullia: Arqalo Inûsugtoq, Ikerasaarsuk
Anigaaserisoq: Mark Mølgaard, Qeqertarsuaq
Ilaasortaq: Inger Jeremiassen, Kitsissuarsuit
Ilaasortaq: Svend Storch, Qeqertarsuaq