Demokraatit Inuusuttaat: Isumatusaarnerunngilaq

- Demokraatit siulittaasuata Jens B. Frederiksenip aatsitassarsiorfimmi atorfikkaanngornera isumatusaarnerunngilaq. Inatsisartuni aatsitassanut tunngasunik aalajangiinerni pingaarutilinni sulianut akuusinnaassusaa apeqqusernarsissaaq.

Demokraatit Inuusuttaanni siulittaasoq Randi Vestergaard Evaldsen siulittaasullu tullia Rasmus Dalsgaard Andersen oqarput.

Naak Demokraatini siulersuisuni ilaasortaasimagaluartup Bent Olsvig Jensenip Jens B. Frederiksen atorfinitsinngikkaluaraa Demokraatit Inuusuttaat isumaqarput Jens B. Frederiksenip aalajangernera isumatusaarnerunngitsoq. Demokraatimmi akuerisinnaanngisaanut kammalaatersornermut pisoq qanitsuummat.

- Taama aalajangiisoqarnera akuerisinnaanngilarput, Randi Vestergaard Evaldsen Rasmus Dalsgaard Andersenilu oqarput.

Nangippullu:
- Aatsitassarsiorneq nunatsinnut siunissami pingaaruteqassaaq, aatsitassanullu Inatsisartuni suliarinninnerni ilaasortaasut sulianut akuusinnaanerat apeqquserneqarsinnaannginnissaa pingaaruteqassalluni. Jens B. Frederiksenip True North Gems Greenlandimi atorfeqalernera pissutaalluni apeqqusernarsissaaq sulianullu pingaarutilinnut akuusinnaassanani.

Lars-Emili pillugu suliaq
- Demokraatit Lars-Emil Johansen Greenland Minerals and Energy-mi atorfinitsinneqarmat isornartorsiorpaat, politikkikkut atorfinititsinertut allaat Demokraatinit taaneqarluni.

- Inuiaqatigiit isaat malillugit isigissagaanni, taava Jens B. Frederiksenip politikkikkut pissaaneqarnera pissutaalluni atorfinissimasutut isikkoqassaaq.

Jens B. Frederiksenip True North Gems Greenlandimi Executive Vice Presidentitut Inatsisartuni ilaasortaanermini atorfeqassaguni inuiaqatigiinnillu taaneqarluni Inatsisartuni ilaasortaalluni atorfittaaminut tulluutinngitsoq isumaqatigineqarsinnaanngitsorlu isumaqarput.

- Demokraatit nunatsinni politikkikkut pisunut malinnaalluartuupput, tamannalu Demokraatit Inuusuttaannit attatiinnassavarput.