imigassartorneq
Demokraatit imigassamik nioqquteqarnerup ammasarneri sivitsortinniarpai
Tallimanngornermi aamma arfininngornermi unnukkut pisiniarfinni imigassanik aalakoornartulinnik pisisoqarsinnaasariaqarpoq, Demokraatit isumaqarput. Siunnersuummulli tapersersuisoqanngilaq.
Pisianiarfiup matuata matoqqasup imigassamik atornerluisumik ataasinnguamik unitsitsinikuunngilaq. Demokraatit imigassamik aalakoornartulimmik talliamanngornikkut arfininngornikkullu nioqqutigineqarneranni nalunaaqutaq qulingiluap tungaanut ammasalertitsinissamik siunnersuuteqartut taama isumaqarput.
- Killilersuinerilli atuuttut arlallit aalakuupallanniarluni imertarnermut sunniuteqartutut imatut oqaatigineqarsinnaanngillat, ilaannilu apeqqutaavoq, killormut sunniuteqaannartannginnersut, Justus Hansen (D) ataatsimiittarfimmi saqqummiussinermini oqarpoq.
Imigassamik ukiuni arlalinni appariartuinnarsimasoq aamma Danmarkimi appasinnerusimasoq taanna innersuussivoq. Kisianni aalakuupallanniartarnersuaq ajornartorsiutaasoq, Justus Hansen isumaqarpoq.
Tassanilu nalunaaqutaq 18 sioqqutilaarlugu imigassarsiniarlutik tunuleriiaattorpassuit, imigassartornermik annertusaasutut isigai.
Qangali akuersissut
Ukiut sisamat matuma siorna Inatsisartut Naalakkersuisullu isumaqatigiittut ammasarfiit sivitsorneqarnissaat suliareqquaat, kisianni tamanna suli pinngilaq. Demokraatit taamaammat inatsisissatut siunnersuut saqqummiuppaat.
Naalakkersuisulli aamma partiit naalakkersuisoqataasut siunnersuut itigigartitsissutigaat, Naalakkersuisut imigassanut nioqquteqarnermut inatsit iluarsaatileruttormassuk, ukiakkullu ataatsimiinnermi siunnersuummik saqqummiussiniarlutik.
- Taamaattumik Naalakkersuisut innersuussutigaat Imigassanik kimittuunik kimikitsunillu nioqquteqarnermi ammasarfiit sivitsorneqarnissaanut siunnersuut ukiakkut ataatsimiinnermi 2017-imi saqqummiunneqassasoq, taamaalilluni imigassat pillugit inatsimmut maannamut atuuttumut tamarmiusumut ilanngullugu suliarineqassammat, peqqissutsimut naalakkersuisoq Agathe Fontain (IA) akissuteqaatimini oqarpoq.
Akunnernik sivisussusilimmik oqallinneq
Sammisaq politikerit ersarissumik oqallisigerusuppasippaat, taakku unioqqutitsilluni imigassanik tuniniaasarnerit, Savalimmiuni, Islandimi aamma nunani musliimeqarfiusuni misilittakkat kiisalu arsaattoqarnerani immiaaqqanik tuniniaasarnerit tikinneqarput.
Oqallinnerup annerpaartaa imigassamik atornerluisut ajornartorsuiteqarnerannut tunngavoq. Tassani Agathe Fontain (IA) aamma Justus Hansen (D) assigiinngitsunik isumaqartut ersarippoq.
Ammasarfiit sivitsorneqannginnerani eqqarsarluaqqaartoqartariaqartoq, peqqissutsimut naalakkersuisoq isumaqarpoq, imigassamik peqqinnanngitsumik atuisunut ajornartorsiutit ajornerulernissaat ernumassutigigamiuk.
Pisiniarfiit killilimmik ammasarneri ajornartorsiumut akiueqataanngitsut, Justus Hansen illuanik isumaqarpoq.
Akunnerit marluk affaanilu oqallittoqareersorlu siunnersuut aappassaaneerneqarnissamut ingerlateqqinneqarpoq, ataatsimiititaliamullu ingerlatinneqarani. Taamaalillunilu itigartinneqarpoq.