Demokraatit Atassutillu nipaannerat pissutaalluni isornartorsiorneqarput

Naalakkersuisooqataasut nipangersimaqqusaasimanerpat?

Inuit Ataqatigiit inuusuttunut immikkoortortaqarfiata toqqaannartumik apeqquteqarput.

- Naalakkersuisooqatigiit decemberimi ivertinneqarmata nuannaartunnguaqarpoq, tamannamita nuannaarneq suli ullumikkumut taama angitiginerpa Naalakkersuisooqatigiinnissamut isumaqatigiissut atsiorneqarmat Demokraatit siulittaasuata Andreas Uldum-ip oqaatigaa politikkikkut patajaattumik ingerlatsinissamut sulissuteqassallutik. Naammiuku taava Demokraatit? Sooruna taama nipaatsigisut? Nipangersarneqarsimanerpat?, Inuusuttut Ataqatigiinni siulittaasup tullia Jane Petersen apeqquteqarpoq. Oqaatigaalu 'Demoraatit Atassullu akisussaaqataallutik peqqinnissaqarfiup politikkikkut akisussaaffigineqarnera partii Siumut iluminni ajornartorsiornerat peqqutigalugu pilliutigineqarsimasoq'.

Naalakkersuisooqatigiinnissamik isumaqatigiissut
Inuusuttut Ataqatigiinnit isumaqarput tamanna naalakkersuisooqatigiinnissamut isumaqatigiissummut imaattumut naapertuutinngitsoq:

'Suleqatigiinnermi pingaartillugu isumaqatigiissutaavoq nunarput inuilu pillugit pitsaasumik, tatiginartumik, tutsuiginartumik innuttaasullu qitiutillugit Inatsisartuni Naalakkersuisunilu sulinissaq'.

- Taamaattumik pissusissamisoorsoraarput Demokraatit Atassullu aperissalugit peqqinnissaqarfiup pingaarnersiunermi pillutigineqarsimanerna tulluartuunersoq? aammalu inuunuiarnikkut ajornartorsiuteqarfioreeqisumut naalakkersuinikkut akisussaasumut suliassaqareeqisumut tunniutissallugu naapertuunnersoq. Inuusuttut Ataqatigiit ersarissumik isumaqarput Naalakkersuisut innuttaasut salliutillugit sullisissagaat partiimi ajornartorsiornerit pingaarnertut inissinnagit.

Greenland Contractors-ip kiffartuussinissamik isumaqatigiissummik annaasaqarneranut tunngasumik suliaq alianartuusoq Inuusuttut Ataqagiinnit isumaqarput. Tamannalu Naalakkersuisunik nassuiaaffigineqarnissaa pisariaqartoq oqaatigalugu. Suliarmi pissutaalluni Nick Nielsen Siumut tunuliaqutaralugu folketingimi ilaasortaajunnaarsinneqarpoq kiisalu Naalakkersuisut siulittaasuata Naalakkersuisoqarfiani pisortaasoq Svend Hardenberg aamma tunuartinneqarallarluni.

Ammassumik sullissinissaq
- Naalakkersuisut siulii qineqqusaarnerup nalaani nipangiussisimapput, ilumoortorli qaqilerneqarmat nunatsinni atorfilittat annersaata (Svend Hardenbergip, aaqq.) suliunnaartinneqarneranik kinguneqartutut isikkoqartinneqarpoq. Pikkunaalliornarpoq tusagassiutitigut nikalluallannartunik saqqummertoqaqattaarnera, siulittaasup tullia Jane Petersen oqarpoq.

Nangillunilu:

- Taamaattumik pissusissamisoorsoraarput Demokraatit Atassullu aperissalugit peqqinnissaqarfiup pingaarnersiunermi pillutigineqarsimanerna tulluartuunersoq. Inuusuttut Ataqatigiinnit paaserusuttorujuussuuarput Demokraatit aamma Atassut pisunut piviusunut annertuunut ulluinnatsinnullu sunniuteqartunut Siumup pilersitaanut qanoq isumaqarnersut. Nipangersimaannarnerat pissutsinut akuersaaginnarnertut paasineqassanersoq imaaluunniit politikkikkut pisunut qanoq isummissallutik qanorlu eqqarsassallutik nalulerluinnarsimaneraat.

Oqaatigineqartut pillugit Demokraatini Atassummiillu qisuariaateqartoqarnissaa Sermitsiaq.AG-mit utaqqimaarneqarpoq.