qinersineq
Demokraatit ammasuunissamik kissaateqarput
Demokraatit siunissami Naalakkersuisut aningaasartuutaasa tamarluinnarmik Naalakkersuisut nittartartagaanni saqqummiunneqartarnissaat kissaatigaat
Maanna qinersinissamut patsisaasoq aallaavigalugu Demokraatit isumaqarput pissusissamisuuginnassasoq siunissami Naalakkersuisut aningaasartuutigisatik tamaasa Naalakkersuisut nittartagaanni saqqummiuttalerpatigit.
- Puigussanngilarput sooq qinersineq manna pisariaqalersimanersoq. Novemberip ulluisa 28-anni qinersissaagut Naalakkersuisut siulittaasuat landskarsi akiligassarsisarfittut atorsimammagu – kingorna aamma paasineqarpoq Peqqissutsimut Naalakkersuisoq aamma taamatut unioqqutitsisimasoq. Demokraatini tamakku innuttaasut akileraarutaannik akuerineqarsinnaanngilluinnartumik pinnguarnerit pinaveersimatinniarpagut.
Demokraatit siulittaasuat Anda Uldum taama tusagassiuutinut nalunaaruteqarluni allappoq.
Aningaasartuutit tamaasa Naalakkersuisut.gl-imut
Taanna nangilluni allappoq Demokraatit sulissutiginiaraat Naalakkersuisut aningaasartuutigisimasaasa tamarluinnarmik saqqummiunneqartarnissaat.
- Angalanernut, ilassinninnernut tunissutinut il.il. aningaasartuutit Naalakkersuisut nittartagaanni tamanit takuneqarsinnaasariaqarput.
Anda Uldum taama allappoq. Taanna aamma oqaluttuarpoq Demokraatit taamaaliornermikkut innuttaasut akileraarutaasa atornerlunneqartarnerat pinaveersaartinniaraat.
- Taamaattumik nittartakkami iserfissamik pisariaqartitsivugut inuinnaat tusagassaqartitsiviillu, Naalakkersuisut paarisassaminnik paarsilluarnersut nakkutigisinnaaniassammassuk, Anda Anda Uldum allappoq. Taassuma Naalakkersuisunngortussat Københavnip Kommunea isumassarsiorfigisinnaagaat ilanngullugu allappoq. Tassami Københavnimi borgmesterip ilassinninnernut aningaasartuutai assigiinngitsut tamanut takusassiarineqartarmata.
Kisianni suli annerusunik saqqummiusserusupput
- Demokraatilli ingerlaqqikkusupput. Tunissutissanut ilassinninnermut aningaasartuutit kisimik qarasaasiami takuneqarsinnaassanngillat – aamma Naalakkersuisut angalatillutik sunik aningaasartuuteqartarnersut takuneqarsinnaasariaqarpoq. Tassa pingaaruteqarpoq aamma atorfillit angalaqataasut aningaasartuutaasa takuneqarsinnaasarnissaat, takuneqarsinnaaqqullugu angalanerit qanorpiaq akeqartarnersut. - Isumassarsiaq ajornanngitsunnguamik piviusunngortinneqarsinnaavoq, aningaasartuutit pineqartut tamarmik nalunaarsorneqartarmata. Suliakkersuutaasussatuaq tassaassaaq tamanut takusassiissutigisalernissaat. Paarlattunik tusagassiuutit allattugaatinik tamanik takujumallutik qinnuteqaataat ikinnerit suliarineqartalissapput.