Aningaasanut inatsit

Demokraatit amigartoorneq quarsaarutigaat

Aningaasaqarnermut naalakkersuisuusimasup, Randi Vestergaard Evaldsenip, naalakkersuisoqatigiit aningaasanut inatsisaat sakkortuumik isortartorsiorpaa

Naalakkersuisoqatigiit aamma Atassutip aningaasanut inatsimmut isumaqatiginninniutit atsiorsimasaat Demokraatit pikkuginngilaat.

Aappaagumut sinneqartoorutissat ikileriarujussuarsimanerat partiip ingammik maluginiarpaa, kiisalu ukiuni sisamani tulliuttuni katillugu 145 millionit koruuninik amigartoortoqarnissaa.

- Demokraatini annilaarutigaarput amerlanerussuteqartut socialistiskiusut aamma naalakkersuisoqatigiit socialistiskiusut aningaasanik atuisinnaanerat. Aningaasanik piginngisatsinnik, Randi Vestergaard Evaldsen allappoq.

Atuaruk: Aningaasanut inatsit piareerpoq

Sinneqartoorutit ikilisut
Partiit naalakkersuisoqatigiit Atassullu aappassaaneerinninnerup kingorna isumaqatigiipput, aningaasanik amerlanerusunik atuisoqassasoq. Katillugu 2017-imi 22 millionit koruuninik sinneqartoortoqassaaq.

- Aggustip qaammataani 2017-mut Aningaasanut Inatsisissaq saqqummiukkakkut sinneqartooruteqarpoq 33 millioner koruuninik aamma ukiunut aggersunut aningaasarsiornikkut akisussaassuseqartumik ingerlatsinissamut pilersaarut sanasimavarput piffissami 2017-miit 2020-mut aningaasaqarnerput oqimaaqatigiittussanngorlugu, Randi Vestergaard Evaldsen (D) allappoq.

Isertitat amerleriartut
Raajat aalisakkallu akiisa qaffakkiartornerisa kinguneranik, aggustimut siunnersuummut sanilliullugu isertitat 55 millionit koruuninik amerleriarsimasut tikkuarpaa, taamaakkaluartorli 2017-imut sinneqartoortutit ikilisimapput.

Atuaruk: Aningaasanut inatsisissap kinguartinneqarnera akuerineqarpoq

Ingerlatseqatigiiffiit akileraarutaannik appaanissaq taamaatinneqartoq
Partiip tamatuma saniatigut ingerlatseqatigiiffiit akileraarutaannik appaanissaq taamaatinneqarmat isornartorsiorpaa. Suliffeqarfiit nunatsinniittut eqqorneqassasut aammma nunanit allaneersut qimaatinneqassasut, partii isumaqarpoq.

Partii naapertorlugu ineriartorneq aamma suliffinnik pilersitsineq eqqorneqassapput.

- Allatut oqaatigalugu Demokraatini tapersersorsinnaanngilarput taama siuariarnissamut ajorseriartitsitigisumik aningaasaqarnikkullu akisussaassuseqanngitsumik nunap aningaasaqarneranut isiginneriaaseqarneq, ajoraluartumik Naalakkersuisunngortut illersugaat, Randi Vestergaard Evaldsenip isornartorsiuinini naggaserpaa.

Aningaasanut inatsit ullumi ataasinngornermi Inatsisartuni akuerineqassaaq. Demokraatit partiini kisiartaallutik inatsimmut itigartitsiniarput.

Powered by Labrador CMS